27.09.2019 «Йәшлек» гәзитенең 39-сы һанына күҙәтеү

Яңылыҡтар, төрлө сара, ашығыс мәғлүмәттәр үтә лә күп. Ҡайһыһына иғтибар биреңкерәмәһәң дә үкенерһең кеүек. Хөрмәт дуҫтар, һеҙҙең өсөн генә баҫмабыҙҙың тәүге биттәренән үк ошондай хәбәрҙәрҙе бирәбеҙ. Беҙгә ауыл халҡы ла ярҙам итә. Тап улар “Ә беҙҙең ауылда” рубрикаһын алып бара. “Аҙна һорауы”на яуап биреп, фекерҙәрен белдерә. Уҡығыҙ, танышығыҙ, үҙегеҙҙең дә хәбәрҙәрегеҙе ебәрегеҙ.

Ә тәүге биттә кем тиһегеҙме? Шәп егет! Таныш булығыҙ: мәргән, булдыҡлы, рухлы...

“Бәләкәй буйлы, нескә билле, һөймәлекле генә һипкелле ҡыҙҙың көслө һәм моңло тауышына һоҡланмау мөмкин түгел. Ул үҙенең таланты менән Башҡортостан данын үҙәк телевидениела, “Голос” тапшырыуында яҡлап сығыш яһаны. Хәҙер инде башҡорт ҡыҙын Рәсәйҙең һәр төбәгендә беләләр, тыңлайҙар, яраталар...” Гөлнур Ҡыуатова Рушана Вәлиева һәм уның әсәһе менән осрашып һөйләшкән. Әңгәмә ҡыҙыҡ, йөкмәткеле.

Суд приставтарына һорауҙар күплеген иҫәпкә алғанда, уларҙың эше лә бик ҡатмарлы. Ә күп кеше был һөнәр эйәләрен бигүке өнәп тә етмәй шикелле. Гәзитебеҙҙең был һанында Зөһрә Йәһүҙина ойошторған “тура бәйләнеш”тә ҡатнашҡан республиканың баш суд приставы Илнур Мәхмүтовтың яуаптары баҫылды.

“Сәләмәтлек” даими рубрикаһы ла үҙ урынында. Һәр ваҡыттағыса төрлө сир-сырхауға ҡаршы халыҡ медицинаһы, табиптар кәңәштәре киң тема менән бирелгән.

Халыҡ-ара оло йәштәгеләр көнөнә бағышланған яҙмаларҙың геройҙарына һоҡланырлыҡ. Һеҙҙең яҡтарҙа ла ундайҙар барҙыр әле.

Хикәйә, “Тормош юлдары ҡатмарлы” рубрикаларын халыҡ ярата. Беҙ быны беләбеҙ һәм тик һеҙҙең өсөн генә фәһем алырҙай, уйландырырҙай, хатта илатырҙай яҙмалар тәҡдим итәбеҙ.

Был һанда “Юлъяҙмалар” рубрикаһында Айҙар Мәжитовтың тарихи темаға яҙылған мәҡәләһе урын алды.