22.02.2019 №8 (11211)

“Йәшлек”тең 22 февраль һанына күҙәтеү

Гәзиттең был һаны ла бай йөкмәткеле, уҡымлы булып баҫылды.
“Бергә беҙ уңышҡа мотлаҡ өлгәшербеҙ”, тип өндәште беҙгә был аҙнала Рәсәй Президенты Владимир Путин. Ил башлығының Федераль Йыйылышҡа Мөрәжәғәтнамәһендә беҙ көткән темалар яҡтыртылдымы? Күҙалланған маҡсаттарға нисек ирешербеҙ? Гәзиттә был һорауҙарға әҙме-күпме яуап табырһығыҙ.

23 февраль – Ватанды һаҡлаусылар көнө. Был байрамда ир-егеттәр мотлаҡ хеҙмәт иткән мәлдәрен иҫләйҙер. Һалдат һурпаһын эскән көслө зат, әрме – ысын тормош мәктәбе, тип кенә ебәрә. Ошо һанда беҙҙең республиканың билдәле кешеләренең армия хәтирәләре тураһында уҡырһығыҙ.

Теманы тағы ла дауам иткәндә, гәзитебеҙ ҙур ғорурлыҡ менән һигеҙ һалдат әсәһе, 15 йыл буйына улдарын әрменән көтөп алған Герой-Әсә хаҡында мәҡәлә баҫып сығарҙы.

Танылған шағирә, журналист Зөһрә Ҡотлогилдина “Ризыҡ ҡәҙерен кем белә?” мәҡәләһендә үҙенең уйланыуҙары, борсолоуҙары менән уртаҡлаша.

Баҫмабыҙҙың даими рубрикаларының береһе “Ауыл: аҫаба халыҡ, бөгөнгө йәшәйеш” был юлы Баймаҡ районының Билал ауылы менән таныштыра. Бында халыҡ нисек йәшәй? Йырлайҙармы, илайҙармы? Киләсәккә өмөттәре ниндәй? Билалдар хәбәрсебеҙ Гөлнур Ҡыуатова менән ихлас аралашты.

Шулай уҡ гәзит биттәрендә М. Кәрим исемендәге хикәйәләр конкурсына килгән “Ташҡын” әҫәренең аҙағы урын алған.

Башҡа ҡыҙыҡлы темалар, мәҡәләләрҙе лә гәзиттән күҙ алмай уҡырһығыҙ. Беҙ һеҙҙең өсөн эшләйбеҙ!