21.03.2014 Ниндәй ҡойма һайларға?
Ҡасандыр йорттарыбыҙҙы тимер йәки ағас ҡойма менән генә кәртәләй инек. Хәҙер кәртә эшләү өсөн материалдар бик күп. Тик шулай ҙа уларҙың ҡайһыһын һайларға белмәй аптырайҙар: ни тиһәң дә, береһе – ҡиммәт, икенсеһе – йоҡа, өсөнсөһөндә лә төрлө кәмселектәр бар.
Ағас ҡойма. Әлбиттә, ҡойманы ағастан эшләү тәүҙә арзан вариант кеүек тойола. Ләкин уның оҙаҡҡа сыҙамауын, ағас ҡортона бирешеүен, йыл һайын буяп торорға кәрәклеген иҫәпкә алһаң, сығымлы булыуы асыҡ күренә. Яҡшы вариант тип әйтмәҫ инек.
Металлопрофилдән ҡойма. Уның менән эш итеүе еңел, тиҙ генә ҡороп ҡуйырға мөмкин. Йыл һайын буяп тороу мәшәҡәте лә юҡ – төрлө төҫтәре бар һәм улар бик оҙаҡҡа етәсәк. Етмәһә, алдан уҡ кәрәк тиклем оҙонлоҡ һәм бейеклектәгеһенә заказ бирергә була. Тик ул ҡиммәт һәм урамдағы шау-шыуҙы үткәрә. Ныҡлы тип әйтеп тә булмай – ат-фәлән бер килеп типһә, эҙе ҡаласаҡ.
Кирбес. Әлбиттә, иң шәбе – тап ошо вариант. Ныҡлы, матур, урамдағы шау-шыуҙы ла үткәрмәй. Тик ҡиммәт…
Таш ҡойма. Был экзотика. Ләкин ул бәләкәйерәк участкаларға бөтөнләй тап килмәй, урынды күп ала, ауыр.
Тимер ҡойма. Әлбиттә, уны матур итеп эшләргә була. Ҡиммәт, әммә мәңгелек.
Ҡыҫҡаһы, иң шәп ҡойма – ошо бөтә материалдарҙы ла бер комбинацияға килтереп төҙөлгәне. Йәғни, тимер ҡапҡа, кирбес менән көпләнгән бағаналар, ә инде оҙонлоҡҡа һуҙылған кәртәне профнастилдан да эшләргә була.