22.12.2018 Башлыҡ булһа, милли булһын!

Бөгөн һыуыҡтан яҡшы һаҡлаған һәм йылыраҡ көндә тирләтмәгән ҡышҡы әйбер табыуы еңел түгел. Сөнки бөтә кейемдең дә составында тиерлек синтетик ҡушылмалар өҫтөнлөк итә.
Иң яҡшыһы – үҙеңә тегеп йәки бәйләп алыу. Бүтәндәрҙән айырылып тороу өсөн әйбергә милли колорит та өҫтәп ебәрергә мөмкин. Этник стилдәге кейемдең хәҙер бик модалы булыуын әйтеп тораһы ла түгел.

Гәзиттең сираттағы оҫтаханаһында Рәлиә Йәһүҙина исемле һылыу ҡышҡы башлыҡ бәйләргә өйрәтә.

Сығышы менән Әбйәлил райо­нының Атауҙы ауылынан булған Рәлиә Рәшит ҡыҙы бер түгел ике һөнәргә эйә. Тәүҙә Сибай педагогия колледжында информатика серҙәрен өйрәнһә, юғары белемде БДПУ-ла, инглиз теле буйынса ала. Педагог М. Кәрим исемендәге 156-сы гимназияла эшләй, әлегә бала ҡарау ялында.

Рәлиәгә оҫталыҡ әсәһенән күскән. Башланғыс класс уҡытыусыһы Римма Лик ҡыҙы Рәхмәтуллина бөтә һөнәргә лә маһир – бәйләй ҙә, сигә лә, һүрәт тә төшөрә, йырлай ҙа, телмәр оҫтаһы ла.

Интернетты әүҙем ҡулланыусылар, бигерәк тә ҡул эштәре менән ҡыҙыҡһыныусылар Рәлиә Йәһү­ҙинаны, иң тәүгеләрҙән булып, селтәрҙе ырғаҡ менән бәйләй башлаусы новатор итеп белә. Тегелгән һәм өҫтөнә сәйлән теҙелгәндән һис тә ҡалышмай уның биҙәүестәре, ауырлығы ла күпкә еңелерәк. Ҡулында ырғағы уйнап торған оҫтабикә үҙе кеүек күңелен һалып ижад итеүсе ҡатын-ҡыҙҙарҙы «Кәрлә турғай» тип аталған төркөмгә туплаған. Ҡатын-ҡыҙҙарҙың ҡул эштәрен бер-береһенә күрһәтеүе – борондан килгән ғәҙәт. Бер-береңде маҡтап, хуп­лап, яңы алымдар өйрәнеп ҡалыу өсөн бынан да ҡулайыраҡ мәл табырмын тимә! «Кәрлә турғай»ҙағы егәрле төркөмдәштәр­ҙең дә сағыу ҡул эштәре матурлыҡҡа әйҙәй, йәшәүгә дәрт бирә, сәмләндерә. Ни өсөн «кәрлә турғай», тигән һорау­ҙы бирмәйенсә түҙә алмаҫһығыҙ моғайын. Баҡһаң, был үҙенсәлекле ҡушамат Рәлиә­нең яратҡан әҫәренә бәйле икән. Бик күптәр кеүек, ул да «Кәрлә турғай – йырсы ҡош» төрөк фильмына ғашиҡ.

Бәйләү, сигеү, сәйлән теҙеү, полимер балсыҡтан әүәләү кеүек эштәрҙе күңел өсөн эшләһә, тиҙҙән оҫта ҡатын заказдар ҙа ҡабул итә башлай. Тәүҙә күҙ нурҙарын түккән әйберҙәре йәл һымаҡ тойола. Унан инде башҡаларҙың бәйләгән кейемен яратып кейеүҙәрен күреп, илһамлана, күңеле күтәрелә. Ә туғандарына, дуҫтарына, таныштарына бүләк иткән әйбер өсөн күпме рәхмәт һүҙе ишетеп шатлана!

Бар буш ваҡытын компьютер йәки телефонға арнаусыларҙан айырмалы рәүештә, ҡул эшенә оҫталарҙың бер минут та буш ваҡыты булмай. Йорт һәм бала хәстәренән бер аҙ ял итергә ултырғанда ла бәйләменә тотона һала. Ундай­ҙарҙың бер минут та тынғы белмәүе һоҡланғыс. Өйҙә ултырғанда заказдар үтәп аҡса эшләүе бер ни тормай, теләк кенә булһын, тип иҫәпләй Рәлиә.

– Тырышлыҡ өлгөһө булып торған ниндәй ҡул эшен атар инең? – тип һорайым.

– Ата-әсәйемә арнап сиккән һүрәт миңә иң яҡыны, – ти оҫтабикә. – 40 сантиметрға 50 сантиметр ҙурлыҡтағы тауарҙа өс ай буйына ҡәҙерле кешеләремдең портреттарын сиктем һәм юбилейҙарына бүләк иттем. Бөгөн был эшем тыуған йортомдоң түрен биҙәй. Тағы ла үҙем өсөн ырғаҡ менән бәйләнгән селтәрем бик ҡәҙерле. Уға теккән аҡсаларҙы мәрхүм атайым тишеп биргәйне. Селтәрҙең тәңкәләре сыңлаған һайын ҡәҙерле кешемдең тауышы ишетелгән төҫлө тойола.

Үҙенсәлекле, ҡабатланмаҫ эштәр хужабикәһе Рәлиә Йәһүҙинаның ҡулдарына күҙ теймәһен!

Сабырлыҡ талап иткән эштең һөҙөмтәһен күреү – оло ҡы­уаныс. Ҡышҡы сатнама һыуыҡтарҙа үҙегеҙ теккән әйберҙән тәнегеҙ генә түгел, күңелегеҙ ҙә йылыныр.