03.07.2015 Аҡсаның 39 проценты – ашауға
Социологтар ғаилә бюджетының ҡайҙа тотонолоуын тикшерергә булып киткән дә, илдең алты төбәгендә һорашыуҙар уҙғарған. “Нильсен” (“Nielsen”) маркетинг компанияһы (Американыҡы, төрлө илдәрҙә филиалдары эшләй) белгестәре Мәскәү, Санкт-Петербург, Түбәнге Новгород, Новосибирск, Дондағы Ростов, Екатеринбургта, йәғни миллиондан ашыу халыҡ йәшәүсе ҡалаларҙа эшләгән.
Асыҡланыуынса, кешеләрҙең ризыҡҡа тотонған сығымы артҡан, магазинға ла йышыраҡ йөрөй башлағандар. Мәскәү, Екатеринбург һәм Новосибирскиҙа йәшәүселәр айлыҡ аҡсаһының 39 – 69 процентын аҙыҡ-түлек һатып алыуға тотона икән. Супермаркеттарға айына ун тапҡыр һәм унан да күберәк баралар. Сағыштырыу өсөн: былтыр бер айҙа һигеҙ тапҡыр ингәндәр.
Санкт-Петербург, Дондағы Ростов, Түбәнге Новгородта халыҡ әллә әҙерәк ашай, әллә һаҡсылыраҡ – уларҙың айлыҡ бюджетынан 17 – 34 процент ҡына ризыҡҡа тотонола. Дөйөм алғанда, кешеләр запасты ике-өс көнлөк итеп ала.
Рәсәй ҡулланыусылар берекмәләренең үҙәк союзы (“Центросоюз”) рәйесе Евгений Кузнецов фекеренсә, аҡсаның ризыҡҡа күберәк тотонолоуы, магазинға йышыраҡ йөрөү кешенең күп ашай башлауын күрһәтмәй, ә хаҡтар артыуын раҫлай. Әгәр элегерәк 1000 һумға алған ризыҡ өс көнгә етһә, хәҙер етмәй һәм ҡабаттан һатып алырға тура килә.
“Агро.ру” сайтынан Айсын АҠБУЛАТОВА әҙерләне.