23.01.2015 Ә беҙҙең ауылда...
Мөслимә ФӘТТӘХОВА,
Әбйәлил районы, Әлмөхәмәт станцияһы:
– Мин Әлмөхәмәт ауыл хакимиәте биләмәһендә уҙғарылған бер нисә сара тураһында һөйләмәксемен. Беҙҙең яҡтарҙа һәр ваҡыт әүҙем тормош бара, ниндәйҙер ваҡиғалар булып тора. Бер нисә көн элек Сиҙәм ҡасабаһы мәсете имамы матур сараға – Мәүлит байрамына йыйып алды. Гөлнур абыстай һәм Рәжәп Юлдыбаевтар ғаиләһе менән дин юлында. Бәйғәмбәрҙе иҫкә алып, мөнәжәттәр әйтеп, доғалар ҡылып, намаҙ уҡып билдәләнек.
Беҙ боронғо йолаларыбыҙҙы тергеҙеү буйынса ла эштәр башҡарабыҙ. Үҙем, ағинәйҙәрҙе саҡырып, бала тыуғас салына торған “Ғаҡиҡа” ҡорбанын салыу мәжлесе үткәрҙем. Малайға – бер, ҡыҙ балаға ике ҡорбан салына. Беҙҙең Гөлмирә ейәнсәребеҙгә арналды был ҡорбан. Алты ауылдан килделәр. Ҡөрьән уҡып, теләктәр теләп, йәштәргә күрһәтеп, еренә еткереп атҡарҙыҡ был эште.
Яңы йылдан алда ла байтаҡ ваҡиға булды. Әлмөхәмәт ауылынан Баҙыян Ғәлләмова ҡорбан салып, ҡунаҡ йыйҙы, бер юлы аласығына эшләгән музейын тамаша ҡылдыҡ, талҡан эшләү серҙәре менән дә таныштыҡ. Сиҙәм ҡасабаһынан Сәкинә Мәғәфүрова бер юлы өс ейәнен әрме сафтарына билдәле булған йолаларҙы башҡарып, йәшен-ҡартын ҙур ҡунаҡҡа йыйып, оҙатты. Әбдрәш ауылынан Менәүәрә Хөсәйенова ла ҡорбан салып, йәш балаға бетеү тағыу йолаһын күрһәтте.
Ғәлимә ИШБУЛАТОВА,
Благовар районы, Һарайлы ауылы:
– Ҡәнзәфәр бей исемендәге Һарайлы башҡорт тарихи-мәҙәни үҙәгендә ауылыбыҙҙың иң оло ағинәйе Рәсимә апай менән осрашыу үтте. 88 йәшен тултырған ағинәй оло булыуына ҡарамаҫтан, ул балаларға дини тәрбиә бирә, Ҡөръән уҡый, аят аштары үткәрә. Тормош иптәше Әнәс менән өс бала ҡарап үҫтерәләр. Улар инде үҙҙәре үк күптән олатай-өләсәй булған, матур тормоштары менән башҡаларға үрнәк. Әлеге ваҡытта Рәсимә апай ҡыҙы Флоридала ҡәҙер-хөрмәт күреп йәшәй. Ауылдарҙа ныҡлы иман менән халыҡты дингә, белемгә әйҙәүсе бындай ил инәләренең булыуы оло шатлыҡ.
Фәниә ТАЖМӨХӘМӘТОВА, Бүздәк районы:
–Балаларҙың оҙайлы ҡышҡы ялдарын Килем ауылы китапханаһы менән мәҙәниәт йорто хеҙмәткәрҙәре күңелле һәм матур ойошторғаны өсөн рәхмәт һүҙҙәрен әйтеп үтке килә. Күңелле Яңы йыл тамашаһын ҡуйыуға күп тә ваҡыт үтмәне, улар балаларҙы “Ҡышҡы мөғжизәләр” кисәһенә йыҙы. Байрамда ауыл ғына түгел, ә ҡышҡы ялдарға туған-тыумасаһына ҡунаҡҡа килгән бөтә балалар ҙа ҡатнашты. Йыр-бейеү, уйын-көлкө, йомаҡтар менән үрелеп барған был байрамда рәссамдарға ла айырым конкурс үткәрелде. Һәр бала тәмле күстәнәстәр менән һыйланды. Шулай уҡ китапханасы Рита Зөбәйерова, бөйөк башҡорт шағиры Шәйехзада Бабичтың тыуыуына 120 йыл тулыу айҡанлы “Яҡты эҙ ҡалдырып” кисәһе уҙғарып ауыл халҡын ҡыуандырҙы. Әҙәбиәт йылының тәүге әҙәби кисәһе ауыл халҡын китап уҡыуға, ижад менән ҡыҙыҡһыныуға әйҙәне.