27.06.2014 Юғары белем кәрәкмәй башланы
Университетта бюджет нигеҙендә уҡып, уҡытыусы һөнәрен үҙләштергәйнем. Аҡса етмәү сәбәпле, махсус курс тамамлап, таныш-тоноштарға массаж эшләй башланым. Медицина белемем булмағас, массаж эшләү өсөн тейешле сертификаттарҙы ала алмайым, шуға ла медицина колледжына уҡырға инергә ине. Түләп уҡый алмаясаҡмын, бер тапҡыр бюджет нигеҙендә белем алғандарҙы тағы ла шулай уҡ бушлай уҡытырҙармы икән? Училищенан һуң университетта бюджет урынына инеп уҡыйҙар ҙа ул, ләкин был ҡағиҙә кире яҡҡа эшләмәй тиеүселәр ҙә бар.
Динә ҒӘҘЕЛШИНА.
Сибай ҡалаһы.
Бюджет нигеҙендә ике тапҡыр юғары белем алып булмай. Колледжда бушҡа уҡый алаһығыҙ, был бит һеҙҙең өсөн тәүге тапҡыр буласаҡ. Бында быға тиклем алынған юғары белемдең бер ҡыҫылышы ла юҡ, хатта унда ла түләүһеҙ уҡыған осраҡта ла. Юғары белемегеҙ тураһында өндәшеп тә тормаҫҡа мөмкин, сөнки дипломдың кәрәге юҡ. Хәҙер күпселек колледждар студенттарҙы имтиханһыҙ, аттестаттағы балл буйынса ғына йыя. Шуға ла әллә ҡайҙа онотолоп ятҡан аттестатты сығарырға тура киләсәк.
Университетта уҡылған фәндәр колледжда ла ҡабатланған хәлдә, улар буйынса ҡайтанан имтихан бирҙертеп тормауҙары ла ихтимал. Ләкин бындай мәсьәләләрҙе һәр уҡыу йорто етәкселеге үҙе хәл итә. Шулай уҡ ҡайһы бер урындарҙа йәш буйынса сикләүҙәр бар. Ундай хәл йыш осрамай. Әммә был мәғлүмәтте иҫтә тотоу ҡамасауламаҫ.
Дуҫтар, яңылыҡтарығыҙ һәм фекерҙәрегеҙ менән www.ye02.ru сайтында йәки vk.com социаль селтәрендәге “Йәшлек” гәзите төркөмөндә (http://vk.com/blog.ye02) уртаҡлаша алаһығыҙ.
Оҡшаш яңылыҡтар
