25.04.2014 Ул Әле лә беҙгә маяҡ

Ағастарҙа, ана, бөрө бүртә,
Һыуҙар тама урғып йылғала.
Бына шундай яҙғы матур көндә
Мәрйәмебеҙ тыуған донъяға.
Аллаһы Тәғәлә ысын ҡатын-ҡыҙ сифаттарын бар тулылығында биргән уға – сибәр ҙә, гүзәл дә, нәзәкәтле лә, һөйкөмлө лә, уңған да. Ә толомдары… Аяҡ бөгәренән дә үтеп торған оҙон матур сәсенә бер ваҡытта ла ҡайсы тейҙермәне.
Был алиһә ҡыҙҙы беҙ 1969 йылда Сибай педагогия училищеһына уҡырға ингән 1 «б» төркөмө студенттары старостабыҙ итеп һайлағайныҡ, яңылышмағанбыҙ, был вазифала ул инде 45 йыл. Бер-беребеҙҙе белеп, аралашып йәшәгән ошо ғүмер арауығында Мәрйәм Хизбулла ҡыҙы Дәүләт­баева төркөмдәштәребеҙҙең бер ғаиләләй тупланып йәшәүен тәьмин иткән ойоштороусы. Күңел торошо, холоҡ-фиғеле тышҡы матурлығы менән үрелеп йәшәгән шәхес ул.
Педучилищела уҡыуы ла өлгөлө булды, БДУ-ла юғары белемгә эйә булып, 30 йылдан ашыу ғүмерен Баймаҡ район-ҡала хакимиәте мәғариф идаралығының кадрҙар бүлегендә әйҙәүсе белгес сифатында уҡытыусыларҙың уҡытыу­сыһы эшенә бағышланы. Бергә эшләгән коллегалары ла Мәрйәм Хизбулла ҡыҙының мәғариф өлкәһендә эшләгән барлыҡ етәксе, уҡытыусыларҙы исем-шәрифе менән белеп, һәр мәктәптең хәл-торошо тураһында хәбәрҙар булып, ниндәй йомош менән мөрәжәғәт итһәләр ҙә, ярҙамһыҙ, иғтибарһыҙ ҡалдырмауын айырым бер йылылыҡ менән телгә ала. Мәғариф өлкәһендә башҡарған йәмәғәт эштәре менән бер рәттән, ҡала һәм район тормошонда ла әүҙем ҡайнап йәшәгән төркөмөбөҙҙөң элекке старостаһы «Башҡортостандың халыҡ мәғарифы отличнигы», «Рәсәйҙең мәғариф отличнигы», тыуған Абдрахман ауылының почетлы гражданы исемдәренә лайыҡ булды.
Хаҡлы ялда ла әүҙем тормош менән йәшәүсе хөрмәтле төркөмдәшебеҙ педучилищены тамамлауыбыҙға 40 йыл тулыуға арналған осрашыу кисәһенә тағы ла бер хөрмәтлеләрҙән-хөрмәтле, арҙаҡлы төркөмдәшебеҙ, Сибай институты директорының социаль, тәрбиә эштәре буйынса урынбаҫары Семен Николаевич Чернов менән бергәләп училище тарихын, һәр төркөмдәштең хеҙмәт уңыштарын, тормош юлын сағылдырған «Википедия 4 «б» группы 40 лет спустя» тип аталған китап баҫтырып сығарҙы.
Тормош юлдашы Миңлехан Рамаҙан улынан да бик уңды Мәрйәмебеҙ. ғүмер юлынан 30 йылға яҡын бергә атлаусы хәләле лә уның эштәрендә ихлас ярҙам итеп, төркөмөбөҙҙөң активисына әүерелде. Сикһеҙ рәхмәтлебеҙ уға. Иңгә-иң терәшеп, тормош йөгөн бергәләп тартҡанға ла тауҙай эштәр атҡарып, гөрләтеп матур донъя көтөп йәшәй улар. Бына тигән ике ҡыҙ тәрбиәләп үҫтерҙеләр.
Көндөң яҡтылығы – ҡояшта,
Күктең матурлығы –
йондоҙҙарҙа.
Ер йөҙөнөң гүзәллеге Мәрйәм Хизбулла ҡыҙы кеүек ҡатын-ҡыҙҙар­ҙалыр, тим.
Уларҙың ғаиләһенә һаулыҡ, бәрәкәтле оҙон ғүмер теләйбеҙ.

Зөлфирә ӘМИНЕВА.
Өфө ҡалаһы.