20.01.2012 Күңелебеҙ киң. Унда аһ-зар ҙа, мөхәббәт тә һыя
Коллегабыҙҙың телефонда дежур итеп, «халҡыбыҙҙа тик аһ-зар ғына икән» тип яҙыуы һөҙөмтәле булды - был аҙнала шылтыратҡан кешеләрҙең һәр береһе тиерлек күңелендәге ыңғай тойғолар менән дә бүлешергә тырышты. Рәхмәт һеҙгә, уҡыусыларыбыҙ, «Йәшлек»тә яҙылған һәр һүҙҙе йотлоғоп уҡып, беҙҙең дә, үҙегеҙҙең дә күңелде күтәргәнегеҙ өсөн!
Шылтыратыуҙарға күҙ һалайыҡ. Улар был аҙнала бихисап булды.
Күгәрсен районының Айһай-Мөрсәләй ауылынан Зилә СПАСКОВА үткән ҡуян йылына рәхмәт әйтеп шылтыратты. 2011 йылда Айһай-Мөрсәләйгә газ ингән. Хәҙер ауыл халҡы ошондай матур бүләк өсөн район, ауыл хакимиәттәре башлыҡтарына оло рәхмәтен белдерә.
ҡыйғы районының ҡолбаҡ ауылынан 75 йәшлек пенсионер Ғиззәтулла Хисмәтуллин, бензин ҡиммәт, тип борсола. Беҙ ҙә килешәбеҙ һеҙҙең менән, ағай! Тик нишләргә икән һуң? Һеҙ тәҡдим иткәнсә, берәй аҡыллы баш водород яғыулығын уйлап сығарып, беҙҙе ҡыуандырһа, ни әйттең дә бит!
Бөрйән районының Мәһәҙей ауылынан бер ҡатын, шылтыратып, ауылдарындағы магазинда хаҡтарҙың үтә лә ҡиммәт булыуына зарланды. Исемен әйтергә теләмәһә лә, «Йәшлек» гәзите хәбәрсеһе килеп, магазиндағы хаҡтарҙы тикшереп, хужаһына ҡарарҙар биреп тә китергә тейеш, тип саҡырҙы. Әлбиттә, беҙҙең журналистар республиканың бөтә ауылдарына ла барып етергә тырыша. Ләкин беләһегеҙҙер бит инде − илебеҙҙә күптән баҙар иҡтисады хөкөм һөрә. Магазиндарҙағы аҙыҡ-түлеккә хаҡты хужаһы үҙе ҡуя. Ә һатып алыусылар был магазиндағы хаҡтар менән риза булмай икән − рәхим итеп башҡа магазинға йөрөһөндәр.
Тик бөтөнләй өмөтһөҙлөккә бирелмәгеҙ, ҡағыҙға баҫылған ҡағиҙәләр бар-барлыҡҡа. Башҡортостан Республикаһында һатылған күп кенә продукцияны ваҡлап һатыу хаҡтарының сиктәре билдәләнгән. Ваҡлап һатыусы аҙыҡ-түлектең накладнойҙағы хаҡына 3 − 30 процент өҫтәй ала. Тик бына хужаның тауарҙы күмәртәләп ниндәй хаҡҡа алыуын ябай һатып алыусы ҡайҙан белергә тейеш һуң? Закон буйынса беҙ һатыусынан сифат сертификатын ғына талап итә алабыҙ. Бына шулай, накладнойҙарҙы республика гәзите журналистары түгел, ил башлыҡтары ла рәхәт кенә һорап ала алмай.
Шулай уҡ Баймаҡ районының Ярат ауылынан да хаҡтарға бәйле шылтыратыу булды. Ундағы бер ирҙең тәмәкегә хаҡ артыуына йәне көйә, ул да магазиндағы һатыусыны әрләй. Ағай, тартмағыҙ ҙа ҡуйығыҙ инде, ҡыҙыл ҡаптағы «Максим» тәмәкеһен 21 һумға алам, тип бер көйһәгеҙ, тәмәке һурып күпме һаулығығыҙҙы бөтөрәһегеҙ. Тартмағыҙ, ике ҡуянды бер юлы атырһығыҙ, уңыштар һеҙгә! «Йәшлек» сәләмәт тормош яҡлы!
Рәхмәт, гәзитебеҙҙе, республика халҡын үткән байрамдар менән ҡотлап, уңышлы, изге йыл теләп шылтыратыусылар күп булды. Ауырғазы районының Үтәймулла ауылынан Вазифа ҒӘЛИУЛЛИНА ауылдарында матур мәҙәни сараларҙың йыш ойошторолоуы тураһында һөйләп, беҙҙе лә ҡунаҡҡа саҡырҙы. Миәкә районынан Гүзәл МӨХӘМӘТЙӘНОВАҒА гәзитебеҙҙәге мәҡәләләрҙең сифатын яҡшыртыу буйынса әйткән кәңәштәре өсөн рәхмәт. Көтөгөҙ, командировкаға һеҙҙең яҡтарға ла юлланырға иҫәп бар. Дүртөйлө районынан Ғәлимә КАМАЛОВА ла беҙҙең тоғро дуҫыбыҙ икән. Ул яратҡан гәзите аша ғаиләһендә ауыр хәл булған ваҡытта ҙур ярҙам күрһәткәндәре өсөн туғандарына, күршеләренә сикһеҙ рәхмәтен белдерә. «Улар ярҙамында ғына бөтә ауырлыҡтарҙы ла еңеп сыҡтыҡ», − ти ул.
Әбйәлил районының Асҡар ауылынан Сәкинә АЙЫТБАЕВА: «Модернизация өсөн аҡса түләмәйҙәр!» − тип шылтыратты. Ул дауаханала санитарка булып эшләй. Һүҙ, моғайын, Башҡортостан Республикаһының 2011 − 2012 йылдарға һаулыҡ һаҡлау системаһын модернизациялау программаһы сиктәрендә медицина учреждениеларына амбулатория-медицина ярҙамын күрһәтеүҙе яҡшыртыуға бүленгән түләүҙәр тураһында баралыр. Программа буйынса түләүҙәргә табиптар һәм урта медицина персоналы дәғүә итә ала. Участка терапевы, участка педиатры, дөйөм практика табиптары (ғаилә табиптары), ошо уҡ табиптарҙың шәфҡәт туташтары был түләүҙәргә дәғүә итә алмай. Кесе медицина персоналына билдәләнгән түләүҙәр хаҡында һүҙ юҡ. Әйткәндәй, БР һаулыҡ һаҡлау министры Георгий Шебаевтың шәхси блогында «модернизациялау» тураһында ҡыҙыу һөйләшеүҙәр бара. Унда теләгән бер кеше инеп, үҙен борсоған һорауҙарға яуап таба алыр. Шулай уҡ Сәкинә Айытбаеваны отпускылар мәлендә персоналдың аҙайып, ике кеше урынына бер кеше генә эшләүе лә борсой. Әлбиттә, был дөрөҫ түгел.
Әлшәй районынан Фаягөл БАЙГИЛДИНА ире менән айырылышҡан һәм бөгөн балаларын үҙе генә тәрбиәләй. Рәсми рәүештә бер ерҙә лә эшләмәгән иремдән алимент түләтеп булырмы икән, тип ҡайғыра ул. Иғтибарлап ҡарағыҙ − һеҙҙең һорауға яуап «Йәшлек»тә сығасаҡ алимент мәсьәләһенә арналған мәҡәләлә буласаҡ.
Беҙҙең дежур телефоныбыҙға шылтыратыусылар араһында гәзиткә яҙылмағандарҙың булыуы бер аҙ күңелде ҡыра. Беҙ бөтә һорауҙарға ла яуапты гәзит аша бирәбеҙ, тимәк, бөтәгеҙгә лә гәзиткә яҙылырға, йә булмаһа, беҙҙең мәғлүмәттәрҙе эҙләп йөрөргә тура киләсәк.
Дежур телефон эшләүен дауам итә, рәхим итеп шылтыратығыҙ!
Лилиә СИРАЕВА
Оҡшаш яңылыҡтар
