03.08.2010 Мөхәббәт йәштәре

Өләсәһе, ейәнсәренең һығылып-һығылып илауын ишетеп, нимә булғанын белгеһе килеп, һораша башлай, әммә ҡыҙ тиҙ генә асылырға уйламай. Ә өләсәйҙәрҙән берәй нәмәне йәшереп ҡалдырып бу­ламы ни? Ейән­сәрен өгөтләй торғас, ул барыбер эштең нимәлә икәнен аңлай. ҡыҙ йө­рөгән егете ме­нән асыуланыш­ҡан. Ейәнсәре өләсәһе хәҙер уны тынысландырыр, нервыларын һаҡларға ҡушыр, тапҡан­һың кем өсөн иларға, төкөр уға, ул һинең күҙ йәштәреңә тормай, онот, бөтәһе лә һинең алда әле, тиер тип көттө. Әммә өләсәһе, йылмайып:
– Һин былай бик мауығып китмә әле, ҡыҙым, ә иларға мөмкин, күңелең күпме теләй. Был күҙ йәштәре һинең мөхәббәтеңде нығытасаҡ ҡына, – тине.
ҡыҙ йәшле күҙҙәре менән өләсәһенә һораулы ҡараш ташланы.
– Нисегерәк итеп аңлатайым икән? – тип, өләсәһе уйға ҡалды. Үҙ тормошонан алынған һығымталар менән аңлатырға тырышты.
– Күҙ алдыңа килтер (шулай уйлаусы мин беренсе кеше түгел), был – һыу. Әгәр һинең мөхәббәтең ныҡ шәрбәт һәм баллы икән, ул ваҡыт һынауын үтә алмай. Уны һыуға һалһаң, шәкәре иреп бөтөп, өҫтө күгәреп, иҫкерер, һин унан тиҙ ялҡыр инең. Вайымһыҙлығың мөхәббәтеңде үлтерәсәк. Ә мөхәббәттең икенсе яғында төрлө ҡаршылыҡтар, үпкәләшеүҙәр, күҙ йәше тора. Бына былар бөтәһе лә бергә һыуҙа тоҙланасаҡ. Яңы ҡыяр ике көн үтеүгә бөрөшә, ә тоҙланғаны йөҙ тапҡыр оҙағыраҡ һаҡлана. Шуның өсөн һинең күҙ йәшең дә мөхәббәттең ғүмерен оҙонайтыу өсөн кәрәк. Минеңсә, ысын мөхәббәт күҙ йәштәрһеҙ булмайҙыр, был уның бер айырылғыһыҙ өлөшө.
Ул ябай ғына аҡ ҡағыҙ битен алып, уртаға бөкләне лә, күҙ йәше тамсыһылай итеп киҫеп алып, ейәнсәренә һуҙҙы һәм ҡағыҙ битен асырға ҡушты. Һәм ҡыҙ усында бәләкәй генә бик һоҡланғыс формалағы йөрәкте күрҙе.

Рәмилә ТАЙСЫНОВА әҙерләне.