02.02.2019 Шәкәрҙе башҡа төрлө лә ҡулланығыҙ

Тәнде таҙартыу өсөн. Гүзәл заттың косметика магазиндарында матур-матур скрабтарға ҡыҙығып, хаҡына күҙ һалғас, уны алмай сығып китеү осраҡтары аҙ түгелдер. Ә бит уның урынына яп-ябай шәкәрҙе ҡулланырға була. Ул, үле күҙәнәктәрҙән таҙартып, тән тиреһен шымарта, хатта целлюлитты ла кәметә. Шәкәр менән таҙартҡандан һуң тире крем, лосьондарҙы ла яҡшыраҡ һеңдерә.
Скраб яһауҙың бер ниндәй ҙә ауырлығы юҡ. 3 ҡалаҡ шәкәргә хуш еҫ өҫтәү өсөн бер семтем какао йәиһә төйөлгән ҡәһүә, 1 – 2 ҡалаҡ балалар кремы ҡушырға. Яҡшылап болғатып, йыуыныр алдынан ошо ҡатнашманы тәнгә ышҡырға.

Ирен ярылғанда. Шәкәр ярҙамында ярылған иренде лә тиҙ генә дауалап була. 1 ҡалаҡ шәкәргә шул нисбәттә эремсек йәки ҡаймаҡ өҫтәгеҙ. Килеп сыҡҡан ҡатнашманы иренегеҙгә һөртөп, 15 минут тотоғоҙ. Һөт аҡһымы һәм майы иренде туҡландыра, ә шәкәр был туҡлыҡлы матдәләрҙең эскә үтеп инеүе өсөн тире күҙәнәктәрен аса.

Терһәк йәки үксә ярылғанда. Бер телем лимон ҡырҡып алығыҙ ҙа, өҫтөнә шәкәр һибеп, үксәгеҙгә ун минутҡа ҡуйығыҙ. Шәкәр үле күҙәнәктәрҙән арындырасаҡ. Ә лимон тиреләге ҡатланған ҡатламды йомшар­тасаҡ.

Шәкәрле һыу майлы ҡулды һәм һауыт-һаба йыуыу өсөн дә бик ҡулай. 1:1 нисбәтендә аш содаһы ҡушып ҡулланығыҙ.