24.01.2019 "Йондоҙло табын" - Рәзилә РӘХМӘТОВА

Бөгөн “Йәшлек” уҡыу­сыларына йәш йырсы Рәзилә РӘХМӘТОВА үҙенең аш-һыу серҙәрен сисә.

Кекс
3 йомортҡаға 1 стакан шәкәр һалып туҡырға. 150 г аҡ майҙы иретеп, ҡушырға. Һуңынан ярты балғалаҡ соданы аш һеркәһе менән һүндереп, килеп сыҡҡан массаға ҡушырға. Артабан ҡуйы ҡаймаҡ кеүек булғансы он өҫтәп бутарға. Табаға һалыр алдынан ҡайнар һыуҙа бүрттерелгән йөҙөм һалырға.
Махсус кекс өсөн тәғәйенләнгән тимер һауытты майлап, ҡамырҙы һалып, 30 – 35 минут 180 градус эҫелектәге духовкала бешерергә.



Брауни (француз десерты)
Беҙҙең ғаиләнең яратып ашаған тәмлекәсе. Был десерт әле берәүҙе лә битараф ҡалдыр­ғаны юҡ, ҡунаҡтар ихлас ашай. Әҙерләүе лә еңел, тәме лә телең­де йоторлоҡ.
300 г аҡ эремсеккә 2 йомортҡа, 50 г шәкәр һалып, миксер менән яҡшылап туҡырға. Был массаны ҡамыр әҙерләгәнсе ултыртып торорға.
100 грамм әсе шоколадты бүлгеләп (ул булмағанда 2 – 3 ҡалаҡ какао порошогы алырға мөмкин), 120 г аҡ май ҡушып, ҙур сөм быяла һауытҡа һалып, һыу парында (на водяной бане) иретергә. Яҡшылап бутап торорға кәрәк. Икенсе сөм һауытта 2 йомортҡаны, 100 г шәкәр, 1 балғалаҡ ванилин, семтем тоҙ һалып, күперткәнсе миксерҙың юғары режимында туҡырға. Миксерҙы туҡтатмайынса был массаға тәүҙә шоколад менән иретелгән майҙы ҡойор­ға. Яйлап 1 ҡап ҡамыр күперткес, 150 г он ҡушырға. Әҙер ҡамыр ҡаймаҡ ҡуйылығында була.

Үҙегеҙгә уңайлы булған формаға пергамент ҡағыҙын түшәп, майлап, тәүҙә шоколадлы ҡамыр­ҙың яртыһын ҡойорға. Өҫтөн тигеҙләгәс, эремсекле крем һыларға, туңған сейә (300 г тирәһе) һибеп, ҡалған ҡамырҙы һалыр­ға. Духовкала 200 градуста 40 минут тирәһе бешерергә.