13.07.2018 Фатир мәсьәләләрендә иғтибарлы булыу мотлаҡ

Һорауҙарға “Росреестр”ҙың БР буйынса идаралығы етәксеһе ярҙамсыһы Н. ШАҺИЕВА яуап бирә.
– Фатир һатып алырға уйлайбыҙ. Мутлашыусылар тоҙағына эләкмәҫ өсөн иң тәүҙә нимәгә иғтибар итергә кәрәк?
Барлыҡ күсемһеҙ мөлкәтте һатып алыр алдынан иң тәүҙә уның тарихын өйрәнеү мөһим. Уны Күсемһеҙ милектең берҙәм дәүләт реестрынан алынған күсермә ярҙамында белергә мөмкин. Документта бинаның барлыҡ мәғлүмәте бирелә: кадастр һаны, күсемһеҙ милектең төрө, адресы, уның эйәләре.
Күсемһеҙ милеккә хоҡуҡты теркәү датаһы ҙур әһәмиәткә эйә. Уны белгәндә, судҡа дәғүә ғаризаһын тапшырыу һәм килешеүҙе тарҡатыу тураһында ваҡытында асыҡларға мөмкин.
– Фатир һатып алдым. Ремонт эшләр алдынан уның планировкаһын үҙгәртергә булдыҡ. Бының өсөн тәүҙә рөхсәт алыр­ға кәрәк икән. Ҡайҙа мөрәжәғәт итергә?
Һәр торлаҡ бинаһының планировкаһын үҙгәртеү ҡала хакимиәте йәки үҙегеҙ йәшәгән урындағы төбәк етәкселегенең рөхсәтенә ярашлы башҡарылырға тейеш. Бының өсөн мөлкәт документтарын, ғариза, планировка проектын тапшырырға кәрәк. Фатирҙағы үҙгәртеү эштәре тамамланғас, ҡабул итеү комиссияһы уны акт менән раҫлай. Һуңынан уны һәм яңы техник документты электрон формала йәки үҙеңә Күп функциялы үҙәккә (МФЦ) тапшырырға кәрәк.