17.05.2014 Мостай Кәрим: Фекерҙәр һәм афоризмдар
Еңеү! Ҡояш балҡый бер битеңдә,
Бер битеңдә – моңһоу ай һаман,
Бер күҙеңдән шатлыҡ нуры һибелә,
Бер күҙеңдән әсе йәш тама...
(“Билдәһеҙ һалдат”).
* * *
Ер йөҙөндә лә, күңел түрендә лә берәүҙе берәү алмаштыра алмай.
(“Сылтыр ҙа ғына сылтыр...”).
* * *
Ер шары ҡоролған хәйләгә...
(“Әйләнә карусель...”).
* * *
Ер шарының картаһына
Ҡараһаң яҡшы ғына, –
Башҡортостан шул картала
Бер япраҡ саҡлы ғына.
Эйе, япраҡ, аҡ ҡайындың
Бер япрағы ни бары.
Ә ҡайыны – бөйөк Рәсәй –
Шундай йәшел, юғары.
(“Ҡайын япрағы тураһында”).
* * *
Ергә тамған һәр тамсы ҡан өсөн кемдер ғәйепле, кемдер яуаплы – ике яҡтың береһе, әлбиттә. Ике яҡ та бер юлы ғәйепле йәки бер юлы ғәйепһеҙ булмай.
(“Оҙон-оҙаҡ бала саҡ”).
* * *
Ерҙең сере бөтә. Күк һайыға.
Төбө күренер бына асылыр ҙа.
Ҡатын кеше генә
Асылмаҫ сер,
Тылсым булып ҡалыр асылында.
(“Өс мөғжизә мине әсир алды...”).
* * *
Ерҙә бер кеше йылмайһа,
Ер йөҙө байрам, тимен.
(“Ялтырап тормайым. Донъя...”).
* * *
Ерҙә йәшәгәндә кеше
Имгәкләмәҫкә тейеш.
(“Шулай башлана йәшәү”).
* * *
Ерҙә күргән тамуҡ ғазаптары әҙәмдең һуңғы сәғәтендә ожмах булып күренәлер, тимен.
(“Көндәлектәр”. 30. IV. 1987).
* * *
Ерҙәге тормош ул – ауыр яҡтары булыуға ҡарамаҫтан, минең аңлауымса, һөйләп бөткөһөҙ бөйөк байрам.
* * *
Ерҙән таш атып, һауалағы бөркөттө кем имгәткән?
(“Ярлыҡау”).
* * *
Если говорить о роли поэзии в современном мире, то ее назначение и цель извечны – сохранять и обновлять человечность.
(“Беседа с Владимиром Коркиным”).
* * *
Если правители и политики будут строить заборы между странами, то поэты должны прорубить хотя бы лазейки, коли они не смогут предотвратить деяния правителей.
(“Көндәлектәр”. 14. IX. 1995).
* * *
Если ты не солдат – ты не поэт, если ты не на фронте, если ты не разделяешь участь солдат, то о героизме, о страданиях и смерти других ты не имеешь права писать.
(“Беседа с Нафи Джусойты”).
* * *
Если уж суждено мосту быть сломанным, то пусть его снесет половодьем.
* * *
Рубриканы Факил Мырҙаҡаев алып бара.