23.04.2013 Библиотөн мауыҡтырғыс үтте
Алдан хәбәр итеүебеҙсә, 19 апрелдән 20-һенә ҡарай төндә беҙҙең республика “Библиотөн” Бөтә Рәсәй акцияһына ҡушылды. Сарала Башҡортостандың 100-гә яҡын китапханаһы төрлө ҡыҙыҡлы программалары менән халыҡты йәлеп итте.
Әхмәтзәки Вәлиди исемендәге Милли китапханала “БиблиоАрбат” тип аталған ҙур сара үтте. Китапхана ҡаршыһындағы йәйәүлеләр майҙаны шау-гөр килеп торҙо. Бында Башҡортостан Президенты Рөстәм Хәмитов, мәҙәниәт министры Әминә Шафиҡова, билдәле яҙыусылар, ғалимдар, сәнғәт эшмәкәрҙәрен дә осратырға мөмкин ине. Рөстәм Хәмитов “Ижади лаборатория” студияһының ҡыҙыҡлы проектында ҡатнашты. Бында ҙур баннерға төшөрөлгән исемһеҙ китаптарға үҙеңдең яратҡан китабыңдың атамаһын яҙырға кәрәк ине. Президент кәрәкле урынға Мостай Кәримдең исемен яҙҙы.
“Мине үҙеңә ал” тигән китап күргәҙмәһе лә халыҡҡа бик оҡшаны. Һәр кем үҙенә оҡшаған китапты алып ҡайтты. Рәсемдәр күргәҙмәһе эшләне, мәҙәни сараларҙа йәштәр ижадына ҙур урын бирелде. М. Аҡмулла исемендәге Башҡорт дәүләт педагогия университеты, Башҡорт дәүләт университеты, З. Исмәғилев исемендәге Өфө дәүләт сәнғәт академияһы, сәнғәт училищеһы студенттары оҫталыҡтарын күрһәтте. Башҡорт тирмәһендә йәнтөйәгебеҙҙең гүзәллегенә арналған китап күргәҙмәһе тупланғайны. Ә Булат Йосоповтың кино мәктәбе ойошторған сарала һәр кем яратҡан китабы тураһында камераға һөйләй алды.
“Библиотөн” республикала икенсе тапҡыр ғына үтеүгә ҡарамаҫтан, ҡыҙыҡлы акция әкренләп тарала бара.