22.05.2012 Донъяны нисек итеп күргегеҙ килә?
Бер кеше йорт төҙөргә уйлай. Иң тәүҙә нигеҙ өсөн тәрән соҡор ҡаҙа. Һирәк кенә ял иткән ваҡыттарында ул аҫтан күктәге болоттарҙы һәм үтеп-һүтеп йөрөгән кешеләрҙең аяҡтарын ғына күргән.
Йорттоң нигеҙе әҙер булғас, кеше беренсе ҡаттың стеналарын төҙөй башлай. Хәҙер ул ерҙә баҫып тора, шуның өсөн дә ял иткән сағында теләһә ҡайһы яҡҡа ҡарай ала. Уға соҡорҙан күренгәнгә ҡарағанда бөтә нәмә лә яҡшыраҡ күренә. Өйө ни тиклем бейегерәк төҙөлгән һайын, кеше лә алыҫҡараҡ ҡарай ала. Икенсе ҡаттан уға бөтә урам тиерлек күренә, ә өсөнсө ҡатты төҙөгәндә инде күрше урамдарҙы ла күрә. Һәр ҡатты төҙөгән һайын күренеш тә киңерәк, кисерештәр ҙә матурыраҡ була бара.
Ә инде өйөнөң ҡыйығына еткәндә, уға бөтә тирә-йүн – өйҙәр, урамдар, тыҡрыҡтар күренә. Ул кешеләрҙең ҡайҙалыр ашығып-ашығып йүгереүҙәрен күҙәтә ала.
Беҙҙе уратып алған донъя хаҡында ҡараштарыбыҙ ҙа шулай уҡ үҙгәрә. Бала саҡта беҙ бик күп нәмәгә иғтибар итәбеҙ. Тик күргән, булған нәмәләрҙе дөрөҫ итеп баһалай ғына алмайбыҙ. Үҫә төшә белемгә, аҡылға эйә булабыҙ. Йылдан-йыл донъя ҙурыраҡ һәм ҡатмарлыраҡ була бара.
Беҙҙең тормоштоң стеналары ни тиклем бейегерәк күтәрелһә, донъя беҙгә иҫ киткес күп яҡлы һәм аңлайышһыҙ булып тойола. Юғарыраҡ күтәрелгән һайын, беренсе һәм икенсе ҡаттарҙан күренгән нәмәләр беҙгә ул тиклем үк мөһим түгел һымаҡ була. Бөтә ваҡ нәмә хәтерҙән юғала, үлсәме бәләкәйләнә.
Үҙегеҙҙән һорағыҙ әле, әлеге ваҡытта һеҙ тормошҡа нисәнсе ҡаттан ҡарайһығыҙ? Һеҙҙең уны бөтә нескәлектәрендәме, әллә бер төрлө генә итеп күргегеҙ киләме? Бының өсөн нимә эшләргә кәрәк?
Рәмилә ТАЙСЫНОВА әҙерләне.