06.11.2015 Йәшлек мәҙәктәре

– Кейәү, ниңә ҡыҙыма ҡул күтәрҙең?
– Иҙел менән киноға барған өсөн.
– Һуң, ул бит һиңә кейәүгә сыҡҡанға тиклем булған хәл.
– Ә мин был турала кисә генә белдем.

* * *
Бер ҡыҙ йүгереп ҡайтып инә лә әсәһенә:
– Әсәй, әсәй, Ирек миңә тәҡдим яһарға йыйына, – ти.
– Теләйме, әллә яһанымы?
– Әлегә яһаманы, әммә ҡатыны менән биш балаһын айырып ебәргән инде.

* * *
– Миңә кейәүгә сыҡсы, Сәғиҙә.
– Кит инде, мин һинән 15 йәшкә кесе лә һуң.
– Борсолма, ҡатыным булһаң, бик тиҙ ҡартайырһың.

* * *
– Күршекәйем, беҙҙең тауыҡ һеҙгә инмәгәнме?
– Кәстрүлде асып ҡара, шунда түгелме?

* * *
Бер ҡартты ҡунаҡҡа саҡыралар. Икенсе көндө танышы осрап:
– Йә, нисек, аш-һыу тәмле булдымы? – тип һораша.
– Мин – ти ҡарт, – бер нәмә лә ашай алманым. Эргәмдә ултырған бер ҡылый күҙле ир табын бөткәнсе минең тәрилкәнән ашаны.

* * *
– Менюҙа балыҡ юҡ ине, ә хәҙер тағы барлыҡҡа килгән. Быны нисек аңларға? – тип һорай бер ир официанттан.
– Әле генә сығып киткән әфәнде балығын ашамай ҡалдырған.

* * *
Депутатлыҡҡа кандидат тултырасаҡ анкетанан: "Һеҙ ҡайҙа уҡынығыҙ? Әгәр бер ҡайҙа ла белем алмағанһыҙ икән, ҡайҙа уҡытаһығыҙ? "Хөкөм ителгәнегеҙ бармы? Әгәр юҡ икән, сәбәбен аңлатығыҙ?"

* * *
Бер һары һаҡаллы ир һаҡалһыҙ хеҙмәтсеһенән көлөү ниәте менән халыҡ алдында:
– Ниңә һаҡалың юҡ? Мосолманға һаҡал-мыйыҡһыҙ йөрөү бер ҙә килешмәй бит, – ти икән.
– Ғәйеп миндә, бай әфәнде, – тигән хеҙмәтсе. – Һаҡал өләшкән ергә һуңлап барҙым. Мин килгәндә ҡара һаҡалдар бөткәйне. Һары һаҡаллы кешеләрҙең йүнһеҙлеген, һаранлығын, туң баш икәнен электән белгәнгә, һарыһын алырға теләмәнем. Шулай итеп буш ҡайтырға тура килде…