31.10.2018 “Юлдаш” тәҡдим итә: “Атайсал”
Йәмғиәттә кешеләр бер уй-фекерҙә, тәртиптә, бер ҡалыпта йәшәмәй, улай йәшәп тә булмай. Берәүҙәр үҙенең көсөн сәйәсәттә һынай, гел алғы һыҙыҡта булыуҙы ярата, икенселәр тыныс тормошта ябай көндәлек мәшәҡәттәр менән сабыр ғына көн күреүҙе үҙ итә. Әүҙем гражданлыҡ позицияһында тороусылар йәки, киреһенсә, миңә ҡағылмай, үҙ ҡалыбымда йәшәйем, тиеүселәр ҙә бар. “Юлдаш” радиоһындағы “Атайсал” тапшырыуы кешеләрҙең ана ошондай төркөмдәргә бүленеүен иҫәпкә алмай, һәр кемгә шәхес булараҡ ҡарауҙы хуплай.
“Атайсал” геройҙары күп ҡырлы. Тыуған ауылын матурыраҡ итергә тырышыусылар, ауылдаштарын эш менән тәьмин итеүселәр, тәбиғәт байлыҡтарын халыҡҡа еткереүселәр һәм башҡалар. Мәҫәлән, Ауырғазы районынан Марс Ғималетдинов эшсән егеттәрҙе ауыл хужалығы кооперативтарына берләштереүҙе үҙенең бурысы итеп ҡарай; Нуримандан Ғәлинур Сәлихов урындағы шифалы үләндәрҙе, аяҡ аҫтындағы байлығыбыҙҙы танытырға тырыша. Әйтергә теләгәнем: тыуған төйәген, ауылын, районын, бер һүҙ менән әйткәндә, атайсалын һәр кем үҙенсә матурыраҡ, күренеклерәк итергә ынтыла, тырышлығы менән башҡаларға үрнәк булып тора.
Ошо көндәрҙә эфирға сығасаҡ сираттағы тапшырыу Белорет районында әҙерләнде. Ғәбдөк ауылы уҡытыусылары, ағинәйҙәр, ғөмүмән, ҡатын-ҡыҙҙар йәштәрҙе иманға ҡайтарыу, ауылды йәшәртеү, эскелеккә ҡаршы көрәш хаҡында һөйләр, фекерҙәре менән уртаҡлашыр. Атайсал – ошондайҙар ҡулында, һеҙҙең, беҙҙең ҡулда.
Һәр шишәмбелә 11 сәғәт 15 минутта “Атайсал” тапшырыуын тыңлағыҙ. Интернеттағы адресыбыҙ: юлдашфм.ру.
Байтулла ФӘТҠУЛЛИН.ф