19.07.2017 Изге эштәр дауамлы
Бөйөк Еңеү байрамы алдынан олатай-бабайҙарыбыҙ башын һалған тарафтарға барып, уларҙың ҡәберҙәренә тыуған ер тупрағы һалыу, хәтер акциялары үткәреү матур күренешкә әйләнде. "Юлдаш" каналы хеҙмәткәрҙәре лә шул юҫыҡта "Бер кем дә онотолмаған" акцияһын ойоштороп, яугир балалары менән Орел өлкәһенә барып ҡайтты. Әле ошо акцияны артабан да дауам итеү эштәре бара.
Һәр кемдең яугир олатаһын ҡәҙерләүе, эҙләп табыуы хуп. Хәҙер документтар архивтарҙа асыҡ һаналһа ла, интернет селтәре эште еңелләштерһә лә, төрлө сәбәп арҡаһында күп осраҡта хәбәрһеҙ юғалған яугирҙарҙы эҙләп табыуы ауырлаша. Шул йәһәттән, "Юлдаш" радиоһы хеҙмәткәрҙәре яугир балаларына олатайҙарын табышыуҙа ярҙам итеп, Еңеү көнөн Орел өлкәһендә билдәләгәйне. Хәтер акцияһында журналистар, артистар, хәрби комиссариат вәкиле һәм мосолман руханиҙары Бөйөк Ватан һуғышында һәләк булғандарҙың туғандары ҡатнашты. Улар өлкәнең Колпна районында булды.
Өлкәлә илебеҙҙең данлы тарихын хөрмәтләп һаҡлайҙар. Район хакимиәте Башҡортостанда һуғышта һәләк булған яугирҙар исемен тергеҙеү, тарихты өйрәнеү буйынса алып барылған эштәрҙе юғары баһаланы, өлкә етәкселеге исеменән республика халҡына, изге эште атҡарып сыҡҡан радио хеҙмәткәрҙәренә оло рәхмәтен белдерҙе. Һөнәрҙәштәремдең артабан да ошо өлкәләге хәтер акцияһы эштәре дауамлы. Шул тарафта илебеҙ азатлығы өсөн көрәшкән олатайҙарҙың исемлеген барлау, яу юлын өйрәнеү эштәре бара. Һәр төбәктән ошо өлкәлә ерләнгән, йә яуҙа ҡатнашып, имен ҡайтҡан яугиры бар. Исемлек беҙҙең рәсми сайтта һаҡлана. Унда http://юлдашфм.рф/ адресы буйынса инеп ҡарарға, мәғлүмәт алырға мөмкин.
Изге сәфәрҙән ҡайтыусылар менән олатайҙарының батырлығы тураһында һөйләштек. "Юлдаш" каналы ойошторған акция ярҙамында олаталары ерләнгән урынды табыуҙары хаҡында һораштыҡ. Шул хаҡта " Яҙмыштарҙа – ил тарихы" тапшырыуында тыңларһығыҙ. Тапшырыу август айында эфирға сығасаҡ, программаны күҙәтеп барығыҙ, хөрмәтле дуҫтар.
Венера СИТДИҠОВА.