22.05.2012 Иң шәп бейеүселәр ҡайҙа? Борайҙа!

Быйыл башҡорт бейеү­ҙәренә яңы һулыш биргән бейеүсе Фәйзи Ғәскәров­тың тыуыуына йөҙ йыл тула. Ял көндәрендә “Нефт­се” мәҙәниәт һарайында Ф. Ғәскәровтың призына халыҡ бейеүҙәрен башҡарыусы ансамблдәрҙең VI Төбәк-ара фестивале үтте.
Бында данлыҡлы шәхестең исемен йөрөткән дәүләт академия халыҡ бейеүҙәре ансамбленән тыш, Башҡортостан ҡала һәм райондары, Та­тарстан, Ханты-Манси Автономиялы Округынан килгән 28 бейеү ансамбле башҡорт, татар, хакас, Кавказ, сиған, рус бейеүҙәрен башҡарып, жюри ағзаларына үҙ һәләтен асты. Жюри Фәйзи Ғәскәров исемендәге башҡорт дәүләт академия халыҡ бейеүҙәре ансамбленең художество етәксеһе, БР-ҙың халыҡ артисы Айҙар Зөбәй­ҙуллин рәйеслегендә сығыш яһаусыларҙы башҡарыу оҫталығы, костюмдары, һайлаған музыка яғынан да баһаланы.
18 – 19 майҙа конкурстың һайлап алыу туры уҙғарылһа, 20 майҙа тамашасылар­ға иң яҡшы тип табылған концерт номерҙарынан торған гала-концерт күрһәтелде. Са­ғыу милли костюмдар­ҙа дәртле, матур итеп бейегән бейеү коллективтарының сығыштары тамашасыларҙың күңеленә хуш килде. Концерттан һуң еңеүселәр билдәләнде. Шулай итеп, конкурс лауреаттары ара­һында өсөнсө урында – Өфө ҡалаһынан “Алант”, Учалы районынан “ҡойон”, Сибай­ҙан “Дарман” халыҡ бейеү ансамблдәре, Стәрлета­маҡ­тан “Дәрүиш” һәм Яңа­уыл районы бейеү ансамблдәре. Икенсе урын Төмән өлкәһе Лянтор ҡалаһынан “Задо­ринка”, Учалы районынан “Ләй­сән” халыҡ бейеү ансам­блдәренә, Татарстандың Әлмәт ҡала­һынан “Әлмә­тем” һәм Күмертау ҡала­һынан “Контраст” бейеү ансамблдәренә бирелде. Беренсе урында – Салауат ҡалаһынан “Ағиҙел” бейеү ансамбле. Ә гран-приға Борай районының “Дуҫ­лыҡ” халыҡ ансамбле лайыҡлы тип табылды.

Флүзә ТҮЛӘКОВА.