18.07.2014 Халҡы менән ишле киләсәге

Ауылды төҙөкләндереү, халҡыбыҙҙың мәҙәниәтен, телен, тарихын, йола һәм ғөрөф-ғәҙәттәрен һаҡлау, халыҡты берләштереү, йәш быуында илһөйәрлек рухы тәрбиәләү, ҡан ҡәрҙәштәр­ҙе осраштырыу маҡсатында ойошторолған «Һаумыһығыҙ, ауыл­даштар!» байрамы Таҡ­һырҙа дүртенсе тапҡыр үткәрелде.
Ҡойо башы инешен, зыяратты, мәсетте, быуа янындағы күперҙе төҙөкләндереү, урамдарға ҡырсынташ түшәү, хужаһыҙ йорттарҙы тәртипкә килтереү кеүек эштәрҙе атҡарып сығыуҙа район советы депутаты, «Әбйәлил урмансылығы» дәүләт учреждениеһы директоры Ишморат Әминев, биләмә башлығы Ҡасим Мостафин, эшҡыуарҙар Йәмил Һатлыҡов, Хөрмәт Хәсәнов, Абрар Ғайсин, Фәрит Әһелов, Гөлсинә Һиҙиәтова, Сәрүә Ғәлләмова һәм башҡалар күп көс һалған. Туҡымбәт ҡайынлығында уҙғарылған байрамға Теләнсе (ауылдың боронғо исеме) халҡы ныҡлап әҙерләнгән.

Таҡһыр башланғыс мәктәбе уҡытыусыһы Р. Зәйнуллина ауыл тарихы менән таныштырып үтте. Таҡһырҙың ете улы була: Хажибай, Әлибай, Аҙнабай, Шәрип, Бәхтийәр, Сабит, Мөхәмәтйәр. Уларҙың улдары Мырҙагилде, Кәрим, Йәһүҙә, Мәғәфүр, Ыласын, Абдрахман, Ғәтиәтулланың исеме күп фамилияларҙа һаҡлана. Ауылда медпункт, башланғыс мәктәп, клуб, балалар баҡсаһы, мәсет уңышлы эшләй. 100 йортта 293 кеше йәшәй. Байрам алдынан 13 өйҙөң ҡыйығы алмаштырылған, 31 тимер ҡапҡа эшләнгән, 14 өйҙөң тышы көпләнгән, 18 баҡса рәшәткәһе яңыртылған, 24 йортҡа евротәҙрә ҡуйылған. Бында 1989 йылда тәбиғи газ үткәрелгән, һәр ихатала тиерлек ҡоҙоҡ ҡаҙҙырылған, телефон үткәрелгән, күп каналлы телевидение ла байтаҡ йорттар тота, хатта йылы һыу, душ кабинаһы менән ҡулланыусылар бар.

Байрамды әүҙем йәмәғәтсе, Башҡортостандың мәғариф алдын­ғыһы, хаҡлы ялда булһа ла, ауыл тормошо өсөн янып йәшәгән, ветерандар советы етәксеһе Мәүлиха Өмөтҡужина йөкмәткеле итеп алып барҙы. Килен булып төшкән ерен, халҡын ихлас маҡтап, ул һәр кемгә йылы, йор һүҙен таба белде, тырыштарҙы маҡтаны, ҡеүәтләне, үҙенең шиғыр юлдары менән дәртлән-дерҙе.

Таҡһырҙарҙы район хакимиәте башлығының төҙөлөш һәм торлаҡ-коммуналь хужалыҡ буйынса урынбаҫары Р. Аҡсурин ҡотланы һәм район бюджетынан 20 мең һум аҡса бирҙе. Төбәк һайлау комиссияһы рәйесе Ғ. Ғиләжев үткән һайлауҙа әүҙемлек күрһәткән Тәлғәт Ласыновҡа, Ишбикә Кәримоваға Почет грамотаһы тапшырҙы. И. Әминев, тулы булмаған мәктәптең элекке директоры Ю. Әүбәкиров, Гусев мәктәбе директоры И. Бәхтийәров, «Завет» ауыл хужалығы кооперативы етәксеһе Ғ. Ғәлләмов таҡһырҙарға йылы теләктәрен еткереп, бүләктәрен тапшырҙы. Таҡһыр мәсете имамы Д. Зәйнуллин иман йортона ярҙам итеүсе ир-егеттәргә түбәтәй кейҙерҙе.

Колхоздың элекке бригадиры Миҙхәт Ласынов – «Ауылдың почетлы гражданы», Һиммәт Ласынов, Мәүлиха Өмөтҡужина – «Иң абруйлы кешеләре», алтмыш йылдан ашыу татыу ғүмер итеүсе, дан ғаиләләр Шәмсинур һәм Нәғимйән Ҡаһармановтар, Фатима һәм Әкрәм Искәнйәровтар, Сара һәм Йәнбирҙе Намаҙбаевтар – «Иң оло пар», Сәүҙә Сафиуллина – «Иң шәфҡәтле ҡәйнә», Гәүһәр Искәнйәрова – «Уңған әсә», Йәмил Һатлыҡов – «Иң текә эшҡыуар», Таңһылыу һәм Гөлназ Намаҙбаевалар – «Иң татыу ҡәйнә һәм килен», Сара менән Вәхит Һиҙиәтовтар һәм Сара Мырҙагилдина «Иң татыу күршеләр» тип табылып, уларға табличкалар бирелде. Шулай уҡ күп балалы ғаиләләр, юбилярҙар, ауылдың иң бәләкәй кешеһе, «Өлгөлө йорт», «Өлгөлө ғаилә» һәм башҡа номинациялар билдәләнде.

Ошоға тиклем Теләнселә ямғыр яумаһа, байрам аҙағына ерҙе һуғарып үтте. Байрамды үткәреүгә күп көс һалған «Өлгөлө йорт» хужаһы Шәфҡәт Ласынов һәм Шәрифйән Ғәтиәтуллин спорт ярыштарын алып барһа, кисен Тимур Ласынов йәштәргә дәртле дискотека үткәрҙе. Байрамды Аҡсәскә Кәримова, Лилиә һәм Радик Хәлиловтар, Азат Атанғолов һәм клуб мөдире Гөлназ Намаҙбаева музыкаль яҡтан биҙәне. Тирмәлә Ләлә һәм Гөлсөм Сафиуллиналар, ҡатын-ҡыҙҙар советы рәйесе Илсинә Баймырҙина, Нурсилә Солтанова ҡунаҡтарҙы тәмле аш-һыу менән һыйланы.
Ихлас күңелле теләнселәр осрашыу байрамын туғандары, ҡан ҡәрҙәштәре менән дауам итте. Ҡунаҡтар йәшәүгә көс-дәрт алып таралышты.

Зөлфиә ЗАҺИТОВА.