21.11.2014 Йырлап йәшәйек, дуҫтар!

Йәйғор булып тыуҙың да һин,
Моңдар булып индең күңелгә.
Һин килгәнһең икән был донъяға
Йырлап йәшәр өсөн бөгөн дә.

Стәрлетамаҡ дәүләт театр-концерт берләшмәһе йырсыһы Ғәзинур Хужәх­мәтов күп йылдар буйына үҙенә генә хас лирик тенорлы тауышы менән башҡорт йыр сәнғәтенең сағыу биҙәге булып тора.

Ишембай районының Ҡол­ғона ауылы егете илһам сығанағын тыуып үҫкән еренән ала. Өфө дәүләт сәнғәт училищеһының йыр бүлеген, артабан Заһир Исмәғилев исемендәге Өфө дәүләт сәнғәт академияһының башҡорт музыка-фольклор бүлеген тамамлаған йәш йырсы 1994 йылда яңы ғына асылған Стәрлетамаҡ дәүләт филармонияһына эшкә ебәрелә һәм бына 20 йылдан ашыу “Ашҡаҙар” башҡорт эстрада-фольклор төркөмөнөң алмаштырғыһыҙ йырсыһы. Башҡорт халҡының тарихына, йолаларына нигеҙләнгән ижады менән тамашасы күңелен яулап, республикабыҙҙың мәҙәниәтен үҫтереүгә, байытыуға күп көс һалыусыларҙың береһе ул.

28 ноябрҙә киске сәғәт 7-лә Стәрлетамаҡ дәүләт театр-концерт берләшмәһе би­наһында йырсы “Йырлай-йырлай тыуған яҡҡа ҡайтам” тип исемләнгән юбилей кисәһенә бөтә дуҫтарын йыя. Кисәлә берләшмәнең талантлы йырсылары – Ришат Хәмитов, Зөлфиә һәм Рәмил Әүбәкировтар, Гүзәлиә Татлы­баева, Айҙар Латипов, Илдар Рәхимғолов, Башҡортос­тан­дың атҡаҙанған артистары Рәйхана һәм Миңлеғәле Хә­сәновтар, Бейеү театры коллективы ҡатнаша. Концертта башҡорт халыҡ, дәртле эстрада йырҙары, күңелдәрҙе күтәрерлек ҡурай моңдары яңғыраясаҡ, йөрәктәрҙе елкендерерлек бейеү­ҙәр тәҡдим ителәсәк. Барлыҡ моң һөйөүселәрҙе концертта ихлас көтөп ҡалабыҙ.

Т. АМАНОВ.