21.02.2014 «Волонтер булыу бик шәп!» –
ти Санкт-Петербург дәүләт университеты студенты Байрас Мәһәҙиев
Хәҙерге заманда Олимпия уйындары һымаҡ ҙур спорт сараларын волонтерҙарһыҙ күҙ алдына ла килтереп булмай. Сочиҙағы Олимпиадала эшләгән 25 мең ирекмән араһында Өфө егете Байрас Мәһәҙиев та бар. Санкт-Петербург дәүләт университетының 3-сө курсында уҡыған егет быға тиклем ике тапҡыр – халыҡ-ара юридик һәм иҡтисади форумдарҙа ҡатнашҡан. Былтыр Сочиға волонтерҙар кәрәклеге тураһында ишеткәс тә ул үҙен йәнә һынап ҡарарға була. Байрасҡа бер нисә этаптан торған етди һайлап алыу аша үтергә тура килә. Айырыуса инглиз телендә аралаша белеүгә иғтибар көслө, төрлө тренингтар ҙа үткәрелә. Уларҙа буласаҡ волонтерҙарға бурыстарын аңлатҡандар, үҙҙәрен нисек тоторға өйрәткәндәр.
Волонтер һүҙе латин теленән ирекмән тип тәржемә ителә, йәғни үҙ теләге менән ярҙам итеүсе. Был хәрәкәт тәү башлап XIX быуатта Америкала барлыҡҡа килә. Рәсәйҙә иһә һуңғы ваҡытта волонтерлыҡты үҫтереүгә ҙур иғтибар бирелә.
Ирекмәндәр төрлө эштәргә йәлеп ителгән: аэропортта спортсыларҙы ҡаршы ала, сит ил делегацияларын оҙатып йөрөй, транспорт хәрәкәтен көйләй, стадиондарҙа ярыштар үткәреүгә ярҙам итә, тәржемәләр яһай.
Байрас «Лаура» исемле саңғы-биатлон комплексының контроль-үткәреү пунктында эшләй. Бер көн спортсыларҙың пропускыларын тикшерһә, иртәгәһенә матбуғат үҙәгенә килеүселәрҙе үткәрә. Был эштә иң мөһиме – иғтибарлы һәм һәр кемгә ярҙамға килергә әҙер булыу. Волонтерҙар Олимпиаданың йөҙө, тип юҡҡа ғына әйтмәйҙәр.
Байрастың саңғы-биатлон үҙәгенә эләгеүе осраҡлы түгел. Ул Өфөләге 39-сы гимназияла уҡыған сағында уҡ «Биатлон» спорт-һауыҡтырыу комплексында шөғөлләнгән. 2009 йылда Өфөлә йәштәр араһында уҙғарылған биатлон буйынса Европа чемпионатында волонтер булып эшләгән.
Байрас үҙе әйтеүенсә, Сочиҙағы эш графигы йыш ҡына ярыштарҙы ҡарарға мөмкинлек бирмәй. Әммә минең быға иҫем китеп бармай, ти ул. Олимпиаданы үткәрешергә ярҙам итеү, шундай ҙур тарихи ваҡиғала үҙеңдең кәрәклегеңде һәм файҙалы булыуыңды тойоу күпкә ҡиммәтерәк һәм баһалыраҡ, тип иҫәпләй.
Был йомала Олимпия уйындары тамамланасаҡ. Байрас Мәһәҙиев ҡабатланмаҫ тәьҫораттар, йылы тойғолар менән ҡайтырға йыйына. Үҙебеҙҙең команда өсөн янып-көйөүҙәр, Рәсәйҙең төрлө төбәгенән йыйылған волонтерҙар менән танышыу, көтөлмәгән осрашыуҙар – бына ошолар иң ҡәҙерлеһе уға. Билдәле спортсылар Антон Шипулин, Мартен һәм Симон Фуркадтар, Максим Чудов, Александр Тихонов менән төшкән фотолар ғүмерлеккә иҫтәлек булып ҡаласаҡ.
Айбулат ИШНАЗАРОВ.