18.10.2013 Сәләмәт йәшәйем тиһәң, йүгер!
Ошо көндәрҙә Ишембай районының Петровское ауылы иң көслө йүгеректәрҙе йыйҙы. Унда күптән инде йолаға әүерелгән еңел атлетика буйынса “Петровское ҡулсаһы” уҙышы үтте. Башҡортостан Республикаһы көнөнә арналған ярышта Ишембай ҡалаһы һәм районынан, Салауат, Өфө ҡалаларынан бөтәһе 175 спортсы ҡатнашты.
Уҙыш үткәреләһе көн һалҡын булды, ваҡыты менән ямғыр һибәләп торҙо. Ләкин еңел генә кейенгән спортсылар, әйтерһең дә, быны һиҙмәй: улар тирә-яҡтарына эйелеп зарядка яһай, мускулдарын яҙа. Аңлашыла, ун километрлыҡ иң оҙон дистанция алдынан етди әҙерлекһеҙ булмай.
Старт һыҙығына тәүгеләрҙән булып иң бәләкәйҙәр – 7 – 12 йәшлек малай-ҡыҙҙар баҫты. Күптәре бындай ҙур уҙышыуҙа тәү тапҡыр ҡатнаша. Шулай ҙа уларҙың бөтәһендә лә финишҡа килеп етерлек сәм һәм дәрт тә барлығы һиҙелә.
Уҙышыуға башланғыс биргән йәш спортсыларҙан һуң биш саҡрымлыҡ дистанцияға 60 йәштән өлкәнерәк спортсылар сыҡты. Ветерандарҙың ярыштарҙа ҡатнашып сынығыуы яҡшы күренде. Хәҙер инде тәжрибәле спортсыларҙың бармаҡ менән генә һанарлыҡ булып ҡалыуына ҡарамаҫтан, улар һаман сафта һәм спорттан айырылғыһыҙ булыуҙары ҡыуандыра.
– “Петровское ҡулсаһы” уҙышында бишенсе тапҡыр ҡатнашам. Ишембайҙан үҙемдән ике йәшкә өлкәнерәк Рауил Миһрановты (73 йәш!) үҙемә тиң ярышыусы тип һанайым. Бөгөн ул минән саҡ ҡына ҡалышты, – тип уртаҡлашты биш километрлыҡ араны беренсе булып үтеүсе 71 йәшлек Өфө ветераны Анатолий Карпенко.
Ә ярыш ҡыҙғандан-ҡыҙа барҙы. Бына стартта ун саҡрым арала көс һынаусы спортсылар күренде. Күҙ асып йомғансы улар уҡтай алға атылды. “40 минут тирәһе уҙа, йылыға инеп торһаҡ та була”, – тиһәләр ҙә, финишҡа яҡынлашыусы тәүге спортсының күренеүе һиҙелмәй ҙә ҡалды. Уның артынса икенсеһе, өсөнсөһө лә ҡалманы. Егеттәрҙән әллә ни күпкә ҡалышмай, ҡыҙҙар ҙа күренде. Саҡ-саҡ тын алып йүгереп килһәләр ҙә, ярышта ҡатнашыусыларҙың кәйефе күтәренке ине. Уҙыштың маршруты еңелдән булмаһа ла, етеҙҙәр араһында бирешеүселәр осраманы.
– Петровскоеға дүртенсе тапҡыр килдем. Дистанция оҙон ғына булғанға күрә иптәш ҡыҙҙар менән бергә йүгерергә тырыштыҡ. Бындай ярыштарҙа ҡатнашыу файҙалы ла, күңелле лә, – тип һөйләне Күгәрсен районы ҡыҙы, ӨДНТУ-ның Салауат ҡалаһындағы филиалы студенткаһы Лиана Иҫәнгилдина.
Ярыш аҙағында еңеүселәр билдәләнде, бик күптәр миҙалдарға, аҡсалата бүләктәргә эйә булды. Тик, нисек кенә булмаһын, ярышта еңеүгә ҡарағанда ҡатнашыу мөһимерәктер.
Гөлназ ХАЛИҠОВА.
Ишембай ҡалаһы.
Автор фотоһы.