27.09.2013 Етәксенән күрмәксе
Һуңғы йылдарҙа тәбиғәткә һаҡсыл ҡараш тәрбиәнең бер өлөшө генә түгел, дәүләт кимәлендә ҙур урын биләп торған өлкә булараҡ та баһа алды. Элек-электән үҙ ғүмерендә ағас ултыртыу кешемен тигән кешенең мөҡәддәс бурыстарының береһе булып һаналған. Быйыл иғлан ителгән Тирә-яҡ мөхитте һаҡлау йылында районда эргә-тирәбеҙҙе йәшелләндереү маҡсаты менән яҙ башынан рәсми рәүештә иғлан ителеп өмәләр үткәрелде, ағастар ултыртылды.
Ә был аҙнала үткән ағас ултыртыу өмәһе рәсми талап буйынса түгел. Күгәрсен районы хакимиәте башлығы Фәрит Мусин тәҡдиме буйынса район хакимиәтенең бер төркөм хеҙмәткәре Мораҙым тарлауығына боролған ерҙә кәртәләнеп алынған баҡсаға ҡарағай, шыршы, миләш ағастары ултыртты.
– Кемдәндер талап итерҙән алда етәкселәр үҙҙәре өлгө күрһәтергә тейеш, тигән фекерҙәр ишетелеп ҡала. Шуға күрә был өлкәгә лә район халҡын йәлеп итеү, әүҙемләштереү маҡсатында тәү башлап хакимиәт хеҙмәткәрҙәре сыҡты. Һәр беребеҙ кәмендә биш төп ағас ултыртты. Был изге эшкә башҡа ойошмалар ҙа ҡушылыр тигән уйҙабыҙ, – ти Фәрит Мырҙагилде улы.
Ысынлап та, “өҫтән” әйткәнде көтөп тормай, үҙең башлап башҡарған эш ырамлы ла була, күңелгә кинәнес тә бирә. Әйҙәгеҙ, барыбыҙ ҙа был изге эшкә үҙ өлөшөбөҙҙө индерәйек, йөҙйәшәр мәғрур ҡарағайҙар киләсәктә беҙҙең хаҡта ла шаулаһын!
Айгөл АЙЫТҠОЛОВА.
Күгәрсен районы.