12.07.2013 Ни сәсһәң, шуны урырһың
Йәш быуынға илһөйәрлек тәрбиәһе биреү дәүләт сәйәсәтенең мөһим йүнәлештәренең береһенә әүерелә бара, тиһәк, һис тә хата булмаҫ. Был юҫыҡта БР Йәштәр сәйәсәте һәм спорт министрлығы һәм башҡа ведомстволар маҡсатлы эш алып бара. Ведомство-ара координация советының шишәмбелә уҙған патриотик тәрбиә биреү һәм граждандарҙы әрме хеҙмәтенә әҙерләүгә арналған тәүге ултырышында ла ошо мәсьәлә ҡаралды. Уны БР Хөкүмәте Премьер-министры урынбаҫары Марат Мәһәҙиев алып барҙы.
Марат Шәриф улы әйтеүенсә, республикала илһөйәрлек тәрбиәһе эшен камиллаштырыу өсөн мөмкинлектәр тыуҙырылған. Беҙҙә йәштәрҙе патриотик тәрбиәләү һәм әрмегә тиклем әҙерләү үҙәге, Рәсәйҙә лидерҙар рәтендә булған хәрби-патриотик клубтар селтәре бар. Шулай уҡ республикабыҙ “Кадет” йәштәр федераль программаһына ҡушылды.
Күпселек муниципаль берәмектәрҙә патриотик тәрбиә биреү клубтары тотороҡло эшләй. Тик Бәләбәй һәм Шишмә райондарында уларҙың һаны кәмеүе күҙәтелә. Бәләбәйҙә 2012 йылда 46 клуб булһа, быйыл улар 25-кә ҡалған, ә Шишмә районында – 23-тән 16-ға.
Бөгөн Асҡын, Бөрйән, Ейәнсура, Күгәрсен, Учалы, Яңауыл райондарында хәрби-патриотик клубтар асыу мәсьәләһе хәл ителмәй килә. Ә бына Дәүләкән, Стәрлебаш, Архангел, Ҡырмыҫҡалы райондарында, Октябрьский, Салауат, Стәрлетамаҡ ҡалаларында бындай тәрбиәгә ҙур иғтибар бирелә.
Башҡортостандың мәғариф системаһында 232 өҫтәмә белем биреү учреждениеһы бар. Уларҙың базаһында уҡыусыларҙы хәрби хеҙмәткә әҙерләүгә йүнәлтелгән секциялар һәм түңәрәктәр асылған. Йыл һайын үткәрелеп килгән “Зарница” һәм “Орленок” спорт уйындарында йөҙ меңдән ашыу үҫмер ҡатнаша.
Ултырышта “2014 – 2016 йылдарҙа Башҡортостан Республикаһында патриотик тәрбиә һәм граждандарҙы хәрби хеҙмәткә әҙерләү” маҡсатлы программаһын эшләү мәсьәләләре ҡаралды. Проект ошо арала БР Хөкүмәтенә тәҡдим ителергә тейеш.
Ултырышта бер нисә йәмәғәт ойошмаһы “РФ граждандарына патриотик тәрбиә биреүҙә әүҙем эшмәкәрлек өсөн” почетлы билдәһе менән билдәләнде. Бынан тыш, ун биш кешегә “Рәсәй патриоты” иҫтәлекле миҙалы тапшырылды. Улар араһында тормош хәүефһеҙлеге нигеҙҙәре һәм физик тәрбиә биреү уҡытыусылары, дин әһелдәре, военкомат хеҙмәткәрҙәре бар.
Гүзәл БИКМӘТОВА.