24.05.2013 Бына был, исмаһам, беҙҙеңсә
Республика министрҙары һөнәрҙәрен алмаштырҙы
БР Хеҙмәт һәм халыҡты социаль яҡлау министрлығы үҙенсәлекле акция үткәрҙе. Улар чиновниктарға хеҙмәт баҙарында талап ителгән һөнәр буйынса эшләргә тәҡдим итте. Шулай итеп, Башҡортостан министрҙары, эшлекле кәңәшмәләр үткәреү урынына, үҙҙәрен ябай эшсе сүрәтендә һынаны.
Мәҫәлән, БР һаулыҡ һаҡлау министры Георгий Шебаев баш ҡалалағы “Өфө икмәге” заводында тир түкте. Уға ҡамыр баҫыу, йә икмәк бешереү эшен бирмәгәндәр, бының өсөн махсус белем һәм тәжрибә кәрәк. Георгий Анатольевичҡа “Черниковский” ҡара икмәген теҙеп һалыусы бурысы йөкмәтелгән. Йәғни ул конвейерҙан килгән икмәкте кәштәләргә һалып барған. 
Икмәк һалыусылар төнгө һәм көндөҙгө сменалап тәүлегенә 12 сәғәт эшләй икән. “Черниковский” икмәге тәүлегенә ун ике тоннаға тиклем етештерелә. Ул арыш һәм беренсе сортлы бойҙай ононан бешерелә, сеймал Сибайҙан һәм Дәүләкәндән алына.
Георгий Анатольевич эш араһында журналистар менән һөйләшергә лә ваҡыт тапты:
– Бер ҡасан да икмәк заводында булғаным юҡ ине. Теҙеүсе эше ауыр түгел, бер ниндәй ҙә сере юҡ, шулай ҙа физик көстө ала. Был тәмле еҫле, аңлашылып торған хеҙмәт, ә иң мөһиме, эш һөҙөмтәһен шундуҡ күрәһең. Йәштәргә бында килергә кәңәш итер инем. Эш ҡатмарлы түгел, бары бурысыңды намыҫ менән үтәргә кәрәк. Хеҙмәт хаҡы яҡшылыр, тип уйлайым. Ни тиһәң дә, халыҡ икмәкте көн һайын һатып ала...
“Өфө икмәге” заводы директоры урынбаҫары Зимфира Власова әйтеүенсә, икмәк теҙеүсе булып ир-егеттәр ҙә, ҡатын-ҡыҙҙар ҙа эшләй ала. Разрядына ҡарап, уртаса эш хаҡы 15 − 20 мең һум тәшкил итә. 
Журналистар күңелен ҡытыҡлап торған һорауҙы бирмәй ҡала алманы. “Георгий Анатольевич, ә һеҙҙең санитар китабығыҙ бармы?” – тигән һорауға министр:
– Юҡ. Әммә дәүләт хеҙмәткәрҙәрендә була торған махсус өлгөлө белешмәм бар. Ул йөкмәткеһе менән санитар китабынан бер нәмәһе менән дә айырылмай, – тине.
БР йәштәр сәйәсәте һәм спорт министры Андрей Иванюта Өфө моторҙар эшләү производство берекмәһендә токарь станогы артында эшләне. Алтынсы разрядлы токарь Михаил Козлов күҙәтеүе аҫтында Андрей Иванович СУ−30 МКИ хәрби самолетының двигателен йышты.
– Унынсы класта хеҙмәт дәресе “Гидравлика” ойошмаһында үтә торғайны. Бер йылдан беҙгә икенсе разрядлы токарь-револьверщик һөнәре бирелде. Был эште онотмағанмын икән, – тине ул оло ҡәнәғәтлек менән, эшен тамамлағас.
Өфө моторҙар эшләү производство берекмәһе – Рәсәйҙә иң эре двигателдәр етештереүсе предприятие. Бында, авиация изделиеларынан тыш, турбина энергетикаһы өлкәһе продукцияһы етештерелә. Бөгөн заводта уртаса эш хаҡы 40 мең һум тәшкил итә. Һәр кемгә социаль пакет бирелә, эшселәр ғаиләләре менән заводтың ял йорттарында көс туплай ала. Йәш белгестәрҙең белемен камиллаштырыу мөмкинлеге бар. Өфө дәүләт авиация техник университетында һәм авиация колледжында уҡыу хаҡын завод тулыһынса ҡаплай.
“Чиновник һөнәрен алмаштыра” акцияһында БР хеҙмәт һәм халыҡты социаль яҡлау министры Ленара Иванова ла ҡатнашты. Ул баш ҡаланың Инорс биҫтәһендә маляр булып эшләне. Хәүефһеҙлек техникаһы буйынса инструктаж үткәс, министрға эш кейеме тотторҙолар. Ленара Иванова 16 ҡатлы йорттарҙың береһендә обой йәбештерҙе.
– Профессионал түгелмен, шуға стена штукатурлау эшен миңә ҡушманылар. Ә обой йәбештереү эше миңә ят түгел, – тине ул.
Ә кисә БР ауыл хужалығы министры Николай Коваленко “Алексеевский” совхозында үҙен ябай ауыл хужалығы хеҙмәткәре булараҡ һынаны. Киләһе аҙнала БР сәнәғәт һәм инновация сәйәсәте министры Алексей Карпухин балта оҫтаһына әйләнәсәк.
Гүзәл ЙОСОПОВА.