30.04.2013 Борон-борон заманда ла,
Ҡуйы урмандар артында ла түгел
Ә бынан дүрт йыл элек баш ҡалабыҙ Өфөлә башҡорт телендә әкиәт һөйләүселәрҙең «Һаумы, һаумы, әкиәт!» ҡала конкурсы ойошторола башланы һәм тәүге йылынан алып балаларҙың яратҡан бәйгеһенә әүерелде. Быны уларҙың унда бик теләп ҡатнашыуынан, ихлас әҙерләнеүенән һәм дә йомғаҡлау тантанаһына зал тулып килеүҙәренән, сығыштарҙы алҡышлап ҡаршы алыуынан да күрергә мөмкин.
Конкурстың йомғаҡлау тантанаһы Башҡорт дәүләт ҡурсаҡ театрында үтте. Тәбиғи, залдағы тамашасыларҙың күбеһе балалар: ата-әсәләре менән килгән кескәйҙәр, балалар баҡсалары тәрбиәләнеүселәре, мәктәп уҡыусылары. Уларҙы әкиәт геройҙары ҡаршы алды. Айһылыу исемле ҡыҙ Мәскәй әбейҙән әкиәт байрамына юлды өйрәтеүен һорай, әммә уныһында байрам ҡайғыһы юҡ, үҙенең тыуған көнө икән. Шулай ҙа балаларҙан үҙенең шартын үтәткәс, байрамға юлды күрһәтергә риза була ул. Ә шарты ябай – уның йомаҡтарына яуап бирергә кәрәк. Әлбиттә, балалар йомаҡтарҙы бик теләп систе. Бына шулай башланып китте тамаша һәм аҙағынаса күңелле уйындар, сағыу сығыштар менән үрелеп барҙы.
Еңеүселәр өс төркөмдә айырым билдәләнде. Мәктәпкәсә йәштәге балалар араһында 3-сө урынға – Ленин районының 118-се балалар баҡсаһынан Таңсулпан Исхаҡова, 2-се урынға – Ленин районының 138-се балалар баҡсаһынан Йәнгүзәл Әминева, 1-се урынға Киров районының 144-се балалар баҡсаһынан Мәрйәм Әхмәтшина лайыҡ булды. Гран-при яулаусы иһә – 95-се балалар баҡсаһынан Рамазан Ҡотлобаев. Ул үҙенә еңеү килтергән «Ялҡау кәзә» әкиәтен конкурстың гала-концертында ла һөйләп күрһәтте. Өс кенә йәшлек Рамазандың әкиәтте шул тиклем оҫта итеп һөйләүен зал тын да алмай тыңланы. Үәт, афарин! Барыһының да танауына сиртте ул! 
1 – 4-се синыф уҡыусылары араһында 3-сө урынға – Дим районының 101-се мәктәбенән Элина Хәкимова, 2-се урынға – Орджоникидзе районының 61-се мәктәбенән Ильмира Сынбулатова, 1-се урынға Калинин районының 128-се гимназияһынан Алһыу Рафиҡова лайыҡ булды. Гран-при – 136-сы башҡорт лицейының 3-сө синыф уҡыусыһы Искәндәр Мәхмүтовта. Ул һөйләгән ненец халыҡ әкиәте «Кәкүк» тә бик фәһемле ине. Балалар был әкиәттән, ни өсөн кәкүк үҙенең балаларын ҡарамай, тигән һорауға яуап тапты.
5 – 7-се синыф уҡыусылары араһында 3-сө урын – 48-се лицейҙан Алина Карамоваға, 2-се урын – Фатима Мостафина исемендәге 20-се ҡала башҡорт гимназияһынан Илнара Рахманғоловаға, 1-се урын 158-се башҡорт гимназияһынан Сафия Ғайсинаға бирелде. Гран-при яулаусы – 76-сы мәктәптән 6-сы синыф уҡыусыһы Динара Рәхимова. Ул украин халыҡ әкиәте «Бейәләй»ҙе һөйләп ишеттерҙе. Уны тыңлаған балалар бергә дуҫ, татыу йәшәү кәрәклеге, күңел киң булһа, кескәй генә бейәләй ҙә барыһын да һыйҙыра ала, тигән фәһем алды.
Конкурс барышында әкиәтте сәхнәләштереү буйынса ла ярыш үтте. Бында иһә «Айыу менән бал ҡорттары» әкиәтен сәхнәләштергән 140-сы башҡорт гимназияһы, «Һаранбай менән Зиннәт ағай» әкиәтен ҡуйған 21-се лицей, «Алпамыша» әкиәтен сәхнәләштереүсе Мостай Кәрим исемендәге 158-се башҡорт гимназияһы уҡыусыларына 3-сө урын бирелде. «Ялҡау малай» әкиәте менән 18-се балалар баҡсаһы тәрбиәләнеүселәре һәм «Башаҡ» украин халыҡ әкиәте менән 47-се гимназия уҡыусылары 2-се урынға сыҡты. 1-се урынды Фатима Мостафина исемендәге 20-се ҡала башҡорт гимназияһының фольклор коллективы яуланы. Улар «Алдаҡсы бай» әкиәтен әҙерләгән.
– Һеҙҙең сығыштарығыҙҙы һоҡланып, ғорурланып ҡарап ултырҙыҡ. Балалар, кескәй генә булыуҙарына ҡарамаҫтан, төрлө халыҡ әкиәттәрен башҡорт телендә тамашасыға еткерә алды. Ҡалабыҙҙа дүрт йыл элек иғлан ителгән конкурстың ошо йылдар эсендә бәҫе артып, ҙур, матур сараға әүерелде. Ул башҡорт телен дәүләт теле булараҡ пропагандалауға, үҫтереүгә булышлыҡ итә. Уны ойоштороусыларға, балаларҙы әҙерләүсе уҡытыусыларға, тәрбиәселәргә оло рәхмәтемде еткерәм, – тине Өфө ҡала хакимиәте башлығы урынбаҫары Сынтимер Баязитов, тантананы йомғаҡлап.
Ысынлап та, тамашанан кескәйҙәр генә түгел, ололар ҙа балаларҙың һәләтенә, оҫталығына һоҡланып, эске бер кинәнес алып таралышты.
Сажиҙә ЛОТФУЛЛИНА.
Юлай КӘРИМОВ фотолары.