15.01.2013 Ҡартлыҡта ла шатлыҡ бар
Йәш быуын уға башын эйә
1951 йылда ғаиләһе менән Салауат ҡалаһына күсеп килә. Тап ошо йылда ҡалабыҙҙа яңы балалар баҡсаһы асыла. Тәүҙә Горький өлкәһенең (хәҙерге Түбәнге Новгород) Камкино ауылында уҡытыусы, аҙаҡ Украинаның Запорожье ҡалаһында асылған балалар йортонда эшләгән Зәлифә Мәүлит ҡыҙы 15-се балалар баҡсаһына тәрбиәсе булып урынлаша.
− Миңә Валентина Ивановна Туганова, Анастасия Ивановна Харчевникова кеүек етәкселәр менән эшләү бәхете тейҙе. Ул ваҡытта бер төркөмгә 20 − 25 бала йөрөй ине. Хәҙерге кеүек уйынсыҡтар юҡ, уларҙы үҙебеҙ эшләнек. Балаларҙың күбеһенә ата-әсә наҙы етмәгәнлеге лә һиҙелә, заман ауыр саҡ. Шуға ла һәр балаға айырым иғтибар кәрәк ине. 3-сө балалар баҡсаһында тәүлек әйләнәһенә эшләргә тура килгән ваҡыттар ҙа булды. 20 йыл ҡалабыҙҙың 8-се балалар баҡсаһында мөдир йөгөн дә тарттым. Ауырлыҡтар күп булды, шулай ҙа уларҙы еңеп сығырға балалар көс бирә ине, − тип хәтирәләргә бирелә Зәлифә инәй.
Зәлифә Мәүлит ҡыҙы – дүрт балаға ғүмер биргән, аяҡҡа баҫырға ярҙам иткән изге әсә лә. Ул һәр балаһына тейешле тәрбиә бирергә, иғтибар бүлергә тырышҡан. Кесе улы Харис төҙөүсе һөнәрен һайлаһа, өлкәне Роберт − уҡытыусы. ҡыҙҙары Хәлиҙә менән Рәйхана ла әсәһе юлын үҙ иткән.
Белемгә, көндән-көн күберәк белергә һәм яҡтылыҡҡа ынтылған кешеләр һәр ваҡыт һоҡланыу тыуҙыра. Бындай сифаттар кемдер “гүзәл” тип һоҡланған, бәғзеләр “көсһөҙ” тип һанаған ҡатын-ҡыҙға хас булһа, айырыуса ҙур әһәмиәткә эйә. Яуаплы, һиҙгер күңелле, ярҙамсыл, иғтибарлы кеше, яҡшы әсәй, өлгөлө өләсәй булған Зәлифә Мәүлит ҡыҙы – маҡтауға, ихтирамға һәм иғтибарға лайыҡ ҡатын-ҡыҙҙарҙың береһе. Ошондай ҡатын-ҡыҙҙар күберәк булғанда донъя йәмлерәк, балалар бәхетлерәк булыр ине.
Альбина ҡОТЛОГИЛДИНА.
Автор фотоһы.