08.01.2013 “Тимер ат” ҡараҡтары
Белорет ҡалаһының шәхси ҡунаҡханаһында һыйланған ир күңел асыу ойошмаһы администраторына ихлас рәхмәтен әйтергә тотона. Йылы һүҙҙән май кеүек ирегән администратор тамам һиҙгерлеген юғалта, хатта әңгәмәсеһе машинаһының асҡысын сәлдереүен һиҙмәй ҙә.
Автомобиле юҡлығын ул бер килке ваҡыт уҙғас ҡына аңлап ҡала һәм был хаҡта полицияға хәбәр итә. Ә был мәлдә “тимер ат” ҡарағы рәхәтләнеп ҡиммәтле “Лексус”та ҡала буйлап елдерә. Тиҙҙән бурҙы эләктерәләр. Уның еңел-елпе ҡылығын берәү ҙә ғәфү итергә йыйынмай – енәйәт эше ҡуҙғатылған. Судтан һуң ҡараҡҡа 120 мең һум күләмендә штраф түләргә йәки биш йылға төрмәгә китергә тура киләсәк.
Белорет ҡалаһында “тимер ат”ҡа бәйле тағы ла бер хилаф эш булған. Бер төркөм егет эскелек табыны артында гөрләшеп ултырған саҡта Ринат (исемдәр шартлы):
– Декабрь ҙә етте, ә мин һаман машинама ҡышҡы тәгәрмәс кейҙермәнем, – тип ауыр уфтанып ҡуя.
– Ә ниңә һатып алмайһың? – тип һүҙгә ҡушыла Марсель исемлеһе.
– Аҡсам булһа-а, күптән алыр инем. Хатта бензинға ла еткереп булмай бит, – тип яуаплай тегенеһе.
“Хәҙер был проблеманы хәл итәбеҙ”, – тип ырғып тора алкоголдән ҡандары арыу уҡ ҡыҙған егеттәр. Машинаға ултырып ҡуҙғалырға торғанда, яғыулыҡ бөткәне асыҡлана. Күп уйлап тормайҙар, яндарындағы “ГАЗель”дән бензин ҡойоп алалар. ҡала буйлап сыға былар. Иҫерек егеттәрҙең иғтибарын ихата алдында торған ВАЗ−2101 машинаһы йәлеп итә. Улар уны “сисендерергә” тотона, тик ни эшләптер дүртенсе тәгәрмәсе ысҡынмай. Егеттәр аптырап тормай, шунда торған икенсе машинаның бер тәгәрмәсен ысҡындыра.
Иртәнсәк дуҫтар “өмә”гә йыйыла – тапҡан байлыҡты машинаға ҡуйырға кәрәк бит! Әммә шул саҡ полиция уларҙы эләктерә. Әлеге мәлдә ҡараҡтар менән тәфтишселәр эшләй. Бына шулай, ярҙам итәм тип, егеттәр бер-береһен ярҙан этеп тә ҡуйған.
Г. БИКМӘТОВА әҙерләне.