16.03.2012 «Белем алыуҙан, өйрәнеүҙән, тәжрибә туплауҙан туҡтамағыҙ»

Вилнур Хәсәнов – Мәсетле райо­нының Дыуан-Мәсетле ауылы егете. Рәми Ғарипов исемендәге беренсе республика башҡорт гимназия-интернатын алтын миҙалға тамамлап, БДУ-ға ингәндең өсөнсө йылына уҡ, йәғни 20 йәшендә хеҙмәт юлын башлай. Журналистика серҙәренә ул, уҡыу менән бергә, «Аҙна» гәзитендә өйрәнә. «ҡыҙыл» дипломлы белгес булараҡ, Башҡортостан райондарын арҡырыһы-буйына иңләп сығыуына Вилнур Рафаил улының ҡәләменең үткерлеген ап-асыҡ тойған етәкселәре уны үрләтә − тәүҙә гәзиттең баш мөхәррире урынбаҫары, унан баш мөхәррире булып китә. Әйткәндәй, республикала иң йәш баш мөхәррир ҙә ул була – яуаплы вазифаға тәғәйенләнгәндә 24 йәше саҡ тулып өлгөрә. Һәр темаға ла иркен яҙа алған, кешеләр менән танышыуҙың тәүге минутынан уҡ ихлас аралашып, үҙенә кәрәк мәғлүмәтте ала белгән был йәш журналист бөгөн өс телдә гәзит сығарған нәшриәт йорто генераль директорының беренсе урынбаҫары, «Аҙна», «Атна», «Неделя» баҫмаларының шеф-мөхәррире. Тормош юлдашы Ләйсән менән Илназ исемле шуҡ малай ҙа үҫтерәләр. Йәш етәксенең рухлы икәне уның «Бәйләнештә»ге битендә үк күренә.
Шулай итеп, Вилнур Хәсәновтан − уңышҡа биш аҙым.
БЕЛЕМЛЕ БУЛЫУ, БЕЛЕМГӘ ЫНТЫЛЫУ

Әгәр белемең булмаһа, йә көн дә белемеңде арттырырға ынтылмаһаң, бер өлкәлә лә үҙеңде табырмын тимә. Белем – уңышлы булыу өсөн иң кәрәкле нигеҙ. Сөнки ундай кеше төплө фекер йөрөтә, теге йәки был ваҡиғаға дөрөҫ анализ яһай, һығымталар эшләй, үҙ эшен яҡшы башҡара. Белеменә таянып, сетерекле хәлдәрҙең күбеһен булдырмай, йә уларҙы мөмкин тиклем тиҙ арала хәл итә. АҡШ-тың мультимиллионеры Рокфеллер ҙа бит: «Инвестиция һалыу өсөн иң яҡшы ер – ул үҙегеҙ», − тигән. Ваҡытында белем алһағыҙ, артабан ул мотлаҡ үҙ дивидендтарын килтерер.

БЕР ЭШТӘН ДӘ ҡУРҡМАУ

Яратҡан эштә генә бар ҡеүәтеңдә тир түгәһең, ул ғына ҡәнәғәтлек килтерә. Һөҙөмтәлә ынтылыштарың, һалған көсөң үҙеңә кире ҡайта – уңыштар яулана. Эш ниндәй генә ауыр, йырып сыҡҡыһыҙ булһа ла, унан ҡурҡмау мөһим. Күптәр ана шул ҡурҡыуы менән бер ни эшләмәй. Ә кем тотона, яйлап булһа ла атҡарып сыға, тәжрибә туплай. Был да – юғарыға, килемле булыуға юл.

БАШҡАЛАРҘАН ЯҡШЫРАҡ ҺӘМ КҮБЕРӘК ЭШЛӘҮ

Үҙ эшен бүтәндәрҙән яҡшыраҡ башҡар­ғандарҙы һәр дәүерҙә, һәр ерҙә ихтирам итәләр. Мәҫәлән, итексе һөнәрен алайыҡ. Әгәр берәүһе насар эшләп, икенсеһе тырышһа, кемдекен күберәк һатып аласаҡтар? Әлбиттә, икенсеһенекен. Уны хөрмәт итә башлаясаҡтар. Ныҡ тырышһаң, һөҙөмтәһе лә күренә, һинең «ҡиммәтең» дә арта.

ӘҘӘПЛЕЛЕК, ҺҮҘЕҢДӘ ТОРА БЕЛЕҮ

Үрҙә телгә алған өс «аҙым» да бер осраҡта эшләмәүе мөмкин − әгәр һин барыһын да алдап, вәғәҙәңде үтәмәһәң, әҙәпһеҙ булһаң, башҡаларҙы ихтирам итмәһәң. Ундайҙарҙан кеше алыҫҡа ҡаса.
Ә бына әҙәпле, изгелекле кешеләргә һәр кем тартыла. Янында дуҫтары, туғандары, таныштары булғандар тау емерә.

УРТАҡ ТЕЛ ТАБА БЕЛЕҮ

Әгәр үҙ фекереңде әйтә алмаһаң, йомоҡ, ҡыйыуһыҙ булһаң, һине тапап үтәсәктәр. Ә был донъяла үҙеңдең бар икәнеңде белдереү кәрәк. Ниндәй юл менән булһа ла (әлбиттә, яҡшылыҡтар аша). Тиҙ уртаҡ тел тапһаң, аралаша белһәң, был − бик яҡшы сифат. Тик уны ла урынлы ҡулланыу кәрәк.
Уңыштар һеҙгә, йәштәр!