24.01.2012 Һалҡындарға бирешмәйбеҙ
Алһыуланған биттәр, йылмайған йөҙҙәр һәм күтәренке кәйеф – һырғалаҡта
ҡышҡыһын иң күңелле ял һырғалаҡталыр ул. Йәштәр, ололар, бәләкәй генә балалар күмәкләшеп боҙҙа өйрөлә. Кемдер эргәңдән елдәй етеҙ елеп үтеп китһә, икенсеһе боҙға тәүге тапҡыр аяҡ баҫҡан да, нисек тәүге аҙымдарҙы яһарға белмәй, баҙап ҡалған. Ярай эргәһендә дуҫы бар, ул иптәшен етәкләп, конькиҙа йөрөү серҙәренә төшөндәрә. Уҡытыусыһы һәйбәтме, әллә өйрәнеүсеһе отҡормо, бер нисә сәғәт йөрөгәндән һуң тимераяҡта апаруҡ баҫып тора башлай һырғалаҡҡа килеүсе.
«Һырғалаҡҡа ял һайын йөрөргә тырышабыҙ, – ти беҙ «Динамо» стадионында осратҡан Әминә менән Гөлсинә. – Беҙҙең өсөн конькиға баҫыу – күңелле ял да, яратҡан шөғөл дә, үҙебеҙҙе формала тотоу ысулы ла. Айырыуса ял көндәрендә, кистәрен бында кеше бик күп була – бик оло йәштәге инәй-олатайҙар ҙа, бәләкәй генә балалар ҙа, тиҫтерҙәребеҙ ҙә байтаҡ йөрөй. Ул саҡтарҙа бигерәк тә күңелле».
Яңы йыл алдынан «Динамо» стадионында башҡорт һырғалағы ла ойошторолдо. ҡыш бабай менән ҡарһылыулы һырғалаҡҡа байтаҡ ҡына башҡорт йәштәре йыйылды. Улар башҡорт йырҙары аҫтында рәхәтләнеп күңелдәре булғансы боҙҙа шыуҙы. Осрашыуҙар, танышыуҙар, аралашыуҙар, һөнәрен күрһәтеп, ҡыш бабайҙан бүләктәр алыу һәр кемдең күңеленә хуш килде. Һырғалаҡтың студенттар өсөн мөһим булған тағы ла бер яғы булды – унда 60 процентлы ташлама ҡаралғайны. Боҙға сығыуҙың – 100, конькиҙы прокатҡа алыу сәғәтенә тағы ла 100 һум икәнен иҫәпкә алғанда, башҡорт һырғалағында йәштәр бушлай тип әйтерлек, күңелдәре булғансы шыуа алды. Һырғалаҡты ойоштороусы Руслан Күскилдин киләсәктә лә ошондайыраҡ саралар үткәрергә ниәтләй.
Һырғалаҡҡа йыш йөрөйөм тиһәң, әлбиттә, иң отошлоһо – үҙ конькиҙарың булыуы. Юҡ икән, аҡса байтаҡ ҡына китәсәк. Өфө һырғалаҡтарының хаҡтарын сағыштырып ҡарайыҡ. Якутов исемендәге паркта боҙға сығыу – ололарға 50, балаларға 40 һум, конькиҙы прокатҡа алыу – сәғәтенә 100 һум. Тик администраторҙарҙың бик ҡунаҡсыл булмауы сәбәплеме, беҙ һырғалаҡҡа барған мәлдә унда бер кешене лә осратманыҡ. «Аҡбуҙат» ипподромының «Hollywood» һырғалағында ла хаҡтар шундай уҡ, биш йәшкә тиклемге балалар бушлай ҙа шыуа ала. М. Ғафури исемендәге паркта бындай ял 250 һумға төшә (прокат – 150 һум, боҙға сығыу – 100 һум). «Төҙөүсе» һәм «Нефтсе» стадиондарында һырғалаҡҡа барыу иң арзаны (прокат – 60 һум, боҙға сығыу – 50 – 60 һум). «Каруанһарай» сауҙа-эш комплексы эргәһендә урынлашҡан һырғалаҡта студенттар, уҡыусылар һәм ун кешенән торған төркөмдәр өсөн ярайһы уҡ ташламалар ҡаралған.
Хаҡтарҙы бик арзан түгел тиһәк тә, артыҡ ҡыйбат та түгел. Студент халҡының кеҫәһенә бик ныҡ һуға, тип тә әйтеп булмай. Сөнки улар барыбер шул аҡсаны дискотекаларға, киноға йөрөүгә бөтөрә. Ә саф һауа, әүҙем ял, дуҫтар менән аралашыу, һаулығыңды нығытыу – быларҙың барыһы күпкә отошлораҡ килеп сыға бит.
Руфина ДӘҮЛӘТОВА
Юлай КӘРИМОВ фотолары