13.08.2011 Халыҡ менән йәнле аралашыу бара
Саҡмағош районы сираттағы праймериз майҙанына әйләнде. Алдан тауыш биреүгә был юлы Баҡалы, Дүртөйлө, Илеш, Кушнаренко, Саҡмағош, Шаран райондары һайлаусылары һәм 40-тан ашыу кандидат йыйылды.
«Берҙәм Рәсәй» партияһының төбәк сәйәси советы секретары, БР Дәүләт Йыйылышы – ҡоролтай Рәйесе Константин Толкачевтың тәбрикләү сығышында билдәләнеүенсә, республиканың 12 майҙансығында үткән праймериз кандидаттарҙың программаларының яҡшы булыуын күрһәтте.
– Был сараларҙа мин һәр сығыш яһаусыны диҡҡәт менән тыңланым. Бөтә Рәсәй халыҡ фронты вәкилдәренең тәҡдимдәрен республика файҙаһына ҡулланырға, уларҙы «Халыҡ программаһы»на индерергә кәрәк, – тине ул. – Беҙ федераль кимәлдә республика мәнфәғәттәрен яҡлай алырлыҡ иң лайыҡлы кандидаттарҙы һайларға тейешбеҙ.
Вәкилдәр алдында 30 кандидат сығыш яһаны. Улар араһында Саҡмағош районы башлығы, «Берҙәм Рәсәй»ҙең урындағы сәйәси советы секретары Риф Йосопов та бар.
– Муниципаль хеҙмәткәр булараҡ, муниципаль власть – халыҡҡа иң яҡыны, тип әйтер инем, – тип билдәләне ул. – 131-се Федераль законға үҙгәрештәр һәм өҫтәмәләр индерелеүен теләйбеҙ. Муниципалитеттарға күп вәкәләт бирелгән, әммә уларҙы бойомға ашырыу өсөн законды камиллаштырыу фарыз.
Вәкилдәр алдында РФ Дәүләт Думаһының, республиканың Дәүләт Йыйылышының ғәмәлдәге депутаттары, эшҡыуарҙар, Халыҡ фронтына ингән йәштәрҙең ижтимағи ойошмалары вәкилдәре, уҡытыусылар, табиптар, спортсылар, хәрбиҙәр сығыш яһаны.
– Беҙ Президентыбыҙға Башҡортостан алдында торған бурыстарҙы үтәүҙә ярҙам итергә бурыслы. Депутат закон сығарыу эше менән генә түгел, ә урындарҙа халыҡтың социаль мәсьәләләрен хәл итеү буйынса ла эшләргә тейеш, – тине Рәсәй Геройы, «Рәсәйҙең машина эшләүселәр союзы» йәмәғәт ойошмаһы ағзаһы Рафиҡ Ихсанов.
«Бөтә Рәсәй медицина хеҙмәткәрҙәре берләшмәһе» ағзаһы, медицина фәндәре докторы Эрик Праздников, һаулыҡ һаҡлау системаһында килеп тыуған хәлде закондарҙы эшкәртеүҙә һәм ҡабул итеүҙә үҙең ҡатнашып ҡына үҙгәртергә мөмкин, тип иҫәпләй.
Кандидаттар һайлаусыларҙың байтаҡ һорауына яуап бирҙе.