19.03.2011 Аҙна аптыратҡыстары
Күрәҙәселәр күрәме?
Япониялағы ер тетрәү һәм дәһшәтле цунами боронғо күрәҙәселәр өсөн бер ҙә сер булмаған.
Нострадамус был афәтте бик теүәл итеп әйтеп биргән, тип уҡыйбыҙ бер үҙәк гәзиттән. Ә Нострадамус нимә тигән һуң? «Оҙаҡламай ер һелкенер, бөтә ерҙе һыу баҫыр», – тигән. Бик дөрөҫ әйткән, тик күрәҙәсе йәшәгән урта быуаттарҙан һуң бындай афәттәр йыш булғылаған түгелме һуң?
Ә замандашыбыҙ, Рәсәйҙең иң «текә» астрологы Павел Глоба 2011 йылдан нимәләр көткән?
– 2011 йылда тыныслыҡ утрауында йәшәрбеҙ, һуғыштар ҙа, тәбиғәт катаклизмдары ла булмаясаҡ, – тип белдергәйне ул былтыр.
Әлдә япондар ишетмәй «тыныслыҡ утрауы» хаҡындағы был аҡыллы фекерҙе, юғиһә,түҙмәй, «харакири» эшләп ҡуйырҙар ине.
Йоҡосоға көн бөтә
Пермь крайы хөкүмәте аппараты етәксеһе Макар Герман бөтә чиновниктарҙың кабинет ишектәрен алырға тәҡдим итте.
Баҡһаң, ҡайһы берәүҙәр, бикләнеп, йә, Хоҙай, йоҡлап алыуҙан да тартынмай икән. Ишекте асып, «тайт» тип һөрәнләгәнсе тегеләре баштарын күтәреп өлгөрә һәм аҡыллы ҡиәфәт менән алдындағы ҡағыҙҙарға йәки компьютер мониторына текәлә, имеш.
Ишектәрҙән арыныу кәрәк, әлбиттә. Өҫтәүенә, ҙур вазифаларға үрләгән чиновниктар, ғәҙәттә, аҙ ашауҙан, күрәһең, арҡырыға үҫә башлай ҙа киң ишектәр уларға тар була башлай – һыймайҙар.
«Миллион давай – олойом»
Бер ҡытай байы тибет мастифы тоҡомло этте 1,5 миллион долларға (45 миллион һум) һатып алған.
Был тоҡом эттәре байлыҡ, уңышҡа өлгәшеү символы икән. Бәхетле һатыусы, махсус питомник начальнигы Ли Лян, бер йәшлек көсөктө үҫтереүгә бик күп аҡса түктек, шуға ла уға урынлы хаҡ ҡуйылды, тип белдергән. Шул тиклем аҡсаны түләһәләр, көн һайын өрөргә, олорға әҙер эттәр генә түгел, беҙҙә кешеләр ҙә бик күпләп табылыр ине.