18.12.2010 Йондоҙнамә 20-26 декабрь
Ылаҡ (22.12 – 20.01)
Был арала ҡәҙимге эштәр яҡшыраҡ барыр. Көн тәртибен Яңы йылға тиклем боҙмаҫҡа кәңәш ителә. Аҙна барышында, ғөмүмән, яҡшы хәбәрҙәр генә ишетерһегеҙ һымаҡ. Иң өмөтлө көндәрегеҙ – шишәмбе һәм шәмбе.
Һыуғояр (21.01 – 19.02)
Аҙна барышында һеҙҙең өсөн яңы мөмкинлектәр асылыр кеүек. ҡайһы бер элек аңламаған ваҡиғаларҙың асылына төшөнөрһөгөҙ. Матди хәлегеҙҙе кесе йомала яҡшырта алырһығыҙ, моғайын. Яңы йылды ҡаршыларға ла аҡса табылды, тимәк.
Балыҡ (20.02 – 20.03)
Донъяуи мәсьәләләр йыш борсоп торор. Яҡын арала сығымдарығыҙҙы барларға мәжбүр булырһығыҙ. Ғөмүмән, тыныс аҙна көтөлә. Иң етди эштәрҙе эшләп бөтөргәнһегеҙ ҙә һымаҡ.
ҡуҙы (21.03 – 20.04)
Йондоҙҙар ярҙам һәм терәк вәғәҙә итә. Тәғәйенләнгән эштәрегеҙгә бер кем дә ҡамасауламай кеүек. Яйлап етеп килгән байрамдарға ла әҙерләнергә була. Шаршамбыла ыңғай ваҡиғалар көтөгөҙ.
Буға (21.04 – 21.05)
Бик тыныс осор. ҡайһы ваҡыт ялҡаулыҡ еңә башлар, моғайын. Бер нәмә эшләмәй, Яңы йыл байрамдарын көтөп ятыу теләге тыуыр. Был дөрөҫ тә булыуы мөмкин. Әүҙемлек күрһәтеп, кәрәкмәгән мәшәҡәттәр тыуҙырыуығыҙ ҙа ихтимал.
Игеҙәктәр (22.05 – 21.06)
Аҙна мәшәҡәтле булырға оҡшай. Эшләп бөтөрөлмәгән эштәрегеҙ артҡа һөйрәр. Шишәмбе файҙаһыҙ үтер. Шаршамбыла кәрәкле кешене көтөп, ваҡытығыҙҙы бушҡа уҙғарырһығыҙ. Был арала яңы кейем һатып алырға кәңәш ителмәй.
ҡыҫала (22.06 – 23.07)
Төп эшегеҙҙә йә уҡыған ерҙә абруйығыҙ артыр кеүек. Үҙегеҙҙә яңы һәләттәр асырһығыҙ, быға башҡалар ҙа аптырар. Бар көндәр ҙә һәйбәт көтөлә, тик шишәмбелә кемдер кәйефегеҙҙе ныҡ ҡына ҡырыр.
Арыҫлан (24.07 – 23.08)
Яңы йылға тиклем элекке бурыстарҙы ҡайтарыу фарыз. Иҫкә төшөрөп ҡарағыҙ, бәлки, күптән онотолған бурыстарығыҙ ҙа барҙыр? Уларҙан ҡотолһағыҙ, тыныс күңел менән байрамға әҙерләнергә була.
ҡыҙ (24.08 – 23.09)
Әгәр тырышлыҡ күрһәтһәгеҙ, байрамдарға тиклем ниндәйҙер бик мөһим мәсьәләне ыңғай хәл итерһегеҙ. Был өҫтәмә сығымдар ҙа талап итер, моғайын. Күңелегеҙ һәр саҡ үҙгәрештәр, яңылыҡ көтөр һымаҡ.
Үлсәү (24.09 – 23.10)
Әүҙем кешеләр өсөн аҙна бик уңышлы көтөлә. Шәхси мөнәсәбәттәр ҡәнәғәтләнерлек булһа ла, уларҙы артабан нығытыу тураһында уйлайһы бар әле. Кемдер тәгәрмәсегеҙгә таяҡ тығып маташа кеүек, уяуыраҡ булығыҙ.
Саян (24.10 – 22.11)
Осор тотороҡло ғына булырға оҡшай. Өйҙәге ваҡиғалар эштәге хәлдәргә лә ыңғай йоғонто яһар, моғайын. Сирле кешеләр бер аҙ еңеллек тойор. Оло йәштәге туғандарығыҙ менән мөнәсәбәттәр мөһим урын алыр.
Уҡсы (23.11 – 21.12)
Һуңғы ваҡыттағы үҙгәрештәрҙең емештәрен татырға тура килер. Яңы йылға тиклем бер нисә мөһим ваҡиға булыуы ихтимал. Шаршамбыла ишеткән яңылыҡ яҡын киләсәккә маҡсаттарығыҙҙы асыҡларға ярҙам итер.