15.02.2013 “Кәкре камера” һеҙҙе көтә

Виртуаль донъяла “йәшәргә” яратыусылар иҫләйҙер әле көҙ көнө “Кәкре камера” конкурсы үткәнен. Был халыҡҡа бик ҡыҙыҡ тойолған һәм уны ойоштороусы, башҡорт телендә хәтәр шәп (заказдар буйынса) футболкалар эшләү менән шөғөлләнгән "ФУТБОЛКАМ" компанияһы йәнә шаяртырға яратыусыларға “ижад” итергә мөмкинлек бирә, йәғни “Кәкре камера – 2” иғлан ителә. Дуҫтар, видеокамерағыҙҙы көйләй-майлай тороғоҙ, конкурс 25 февралдә башлана.
Видеоһүрәтләмәләр “Бәйләнештә” (“Вконтакте”) селтәренең ФУТБОЛКАМ (vk.com/futbolkam) төркөмөндә ҡабул ителәсәк.
Ә ниндәй маҡсат менән үткәрелә һуң был ярыш, тиерһегеҙ. Белеп-күреп тораһығыҙ, социаль селтәрҙәрҙә, сайттарҙа миллионлаған ҡыҙыҡлы видеояҙмалар, шаҡ ҡатырғыс шаяртыуҙар шығырым тулы, әммә күпселеге инглиз, рус йә сит телдәрҙә. Ойоштороусыларҙың береһе Руслан Күскилдин әйтеүенсә, “Кәкре камера“ башҡорт телендә ҡыҙыҡлы видеоны арттырыу, популярлаштырыу маҡсатын ҡуя. Иң мөһиме – башҡорт юморын үҫтерергә, доньяға күрһәтергә, башҡортса кәйеф күтәрергә шәп мөмкинлек тыуа.
Конкурста теләгән һәр кем ҡатнаша ала. Әммә видеояҙмағыҙ ҡыҙыҡлы, юмор менән бәйле, йылмайыу уятырлыҡ булырға тейеш. Был – төп шарт. Уның фәҡәт башҡортса булырға тейешлеген аңлағанһығыҙҙыр. Яҡшы сифатлы, иң ҡыҫҡаһы – 10 секунд, иң оҙайлыһы биш минутҡа һуҙылған яҙма көтәбеҙ.
Әйткәндәй, жюри билдәләгән призлы урындарҙан тыш, иң күп “йөрәк” йыйыу юлы менән “Интернет һөйөүе” номинацияһында ла еңеүселәр билдәләнәсәк. Иң шәп яҙмаларға тәғәйенләнгән аҡсалата приздар, футболкалар, бағыусылар бүләктәре әле үк әҙерләнә башланы. 25 февралдә старт бирелгән ярыш 24 мартҡаса дауам итә. Көлкө көнөндә, йәғни 1 апрелдә еңеүсе һәм призерҙарҙы белербеҙ. Конкурстың партнерҙары: “Йәшлек“ гәзите, “Шоңҡар“, “Ватандаш“ журналдары, Башҡорт йәштәре иттифағы, Башҡорт асыҡ КВН лигаһы, “БашЛидер“ төбәк йәштәр йәмәғәт ойошмаһы.

А. ЗИННУРОВА.