20.09.2013 Барыһын да һоҡландырған пар

Был фотолағы әбей менән бабай Ишбикә һәм Нуриян Абдразаҡовтар интернетта күптән инде танылған геройҙар — уларҙың шаян, йәштәрсә дәртле үбешеп ултырыуы йәше-ҡартында оло ҡыҙыҡһыныу уятты. Күҙ асып йомғансы популярлашҡан һүрәт аҫтына күптәр “Ысын һөйөү тап ошондай булырға тейеш!”, “Бына ҡайҙа ул иң матур, ихлас пар!”, “Улар кеүек тиң ҡартайһаң ине!” тигән комментарийҙар яҙа.

Ҡарттарҙы май айында БЮТ журналисы Илдар Байбулатов 85 йәшлек юбилейҙарын һәм 65 йыл бергә татыу ғүмер итеүҙәренә арналған мәжлестә төшөргән. Әбйәлил районының Хәлил ауылында йәшәүсе парға ҡарап, күптәр һоҡланыу белдерҙе, хәҙерге йәштәргә өлгө итеп ҡуйҙы. Ишбикә инәй менән Нуриян бабай­ҙы хатта Татарстанда баҫылған “Аҡсарлаҡ” шәхси гәзитенең хәбәрсеһе Зәйнәп Солошина эҙләп тапҡан һәм “Ишбикә әбей менән Нуриян бабайҙан мөхәббәт формулаһы” тигән интервью яҙған.
Ишбикә менән Нуриян беренсе кластан уҡ бер парта артында белем ала. Егеттең комбайнсылар курсын тамамлап һәм әрме сафында хеҙмәт итеп ҡайтыуын ҡыҙ һағынып көтөп ала. 1947 йылда йәштәр туй яһай. Бабай һөйләүенсә, ул саҡтағы туйҙар­ҙы бөгөнгөләр менән сағыштырырлыҡ та түгел. Шәкәр ҙә табып булмаған ауыр осорҙа табында ҡатыҡ менән икмәктән башҡа һый булмай. Шулай ҙа бер ҡунаҡ та ризаһыҙлыҡ күрһәтмәй. Ә хәҙер күпме аҡса түгеп, бар донъяны шаулатып ресторандарҙа өйләнешәләр, тик ярты йыл йәшәйҙәрме-юҡмы, айырылыу яғын ҡарайҙар. Ҡарттарҙың оҙаҡ ваҡыт татыу һәм тиң йәшәүенең сере – бер-береңә юл ҡуйыу һәм хөрмәт итеү. Береһе асыулан­ған мәлдә икенсеһе бер ҡасан да ауыҙ асып ҡаршы һүҙ әйтмәгән. “Эйе, һин хаҡлы, ғәфү ит”, – тип эйелгән баш шунда уҡ ярһыусыны тынысландыра, мөхәббәт тойғолары хаким иткән ерҙә ғорурлыҡҡа урын юҡ, бер-берең алдында баш эйеп кенә йәшәргә кәрәк.
Абдразаҡовтарҙы яҡын тирәлә тормош һөйөүсән, шуҡ, йор һүҙле кешеләр тип беләләр.
– Бер-беребеҙ менән 65 йыл буйына шаярышып йәшәйбеҙ. Хәләлемде үпмәй ҡалған бер көнөм дә юҡ. Иҫәпләп сығар­һаң, 65 йыл эсендә яҡынса 24 мең көн. Көнөнә бер тапҡыр үпкәнмен тип һанағанда ла, мин әбейемде кәм тигәндә 24 мең тапҡыр үпкәнмен. Был бәхет түгелме ни? – ти Нуриян бабай.
“Әбей менән бабайҙың ҡолаҡтары насар ишетһә лә, йәшәүгә дәрттәре һүнмәгән, гөрләтеп донъя көтөп яталар. Уларға күҙ теймәһен, иҫәнлек-һаулыҡ һәм тағы ла бәхетлерәк ҡартлыҡ теләйем”, – тип һоҡланыуын белдерә хәбәрсе.

Л. ТАШБУЛАТОВА.