21.03.2015 Ғаләмде биҙәй матурлыҡ һәм хис

Кемдәр улар – 23-сө йыл рәттән үткәрелеп килгән матурлыҡ бәйгеһенең быйылғы ҡатнашыусылары?
Береһенән-береһе матур, аҡыллы, маҡсатлы ҡыҙҙар менән таныштырып үтәбеҙ.

Светлана КОЖАРИНОВА, 21 йәш
Силәбе өлкәһенең Магнитогорск ҡалаһынан. Тамырҙары менән Әбйәлил башҡорто. Киләсәктә үҙенең матурлыҡ салонын асырға хыяллана.

Әлфиә КИЛДЕЙӘРОВА, 19 йәш
Ейәнсура районының Абзан ауылынан. Әлеге ваҡытта Мәскәү ҡалаһында белем ала. Баш ҡалала үткәрелгән “Башҡорт һылыуы” конкурсы еңеүсеһе. Нәзир Байегетов етәкселегендәге “Алтынай” башҡорт бейеү ансамблендә шөғөлләнә.

Нәркәс НАСИРОВА, 18 йәш
Сибай ҡалаһынан. Буласаҡ уҡытыусы, бейергә ярата. Киләсәктә бәхетле ғаилә ҡорорға хыяллана. Башҡортостандың тәбиғәтенә һәм ҡымыҙына ғашиҡ.

Гөлназ ИЛЬЯСОВА, 17 йәш
Ишембай ҡалаһынан. Нефть эшкәртеү колледжында белем ала. “Һылыуҡай” конкурсында ҡатнашыу – бала саҡтан килгән хыялы.

Илнара ҮТӘШЕВА, 17 йәш
Йылайыр һылыуы. Әлеге ваҡытта Санкт-Петербург ҡалаһында ер һәм төҙөлөш эше буйынса белем ала. Киләсәктә был ҡалала йәшәүсе башҡорт балалары өсөн бейеү ансамбле асырға ниәтләй.

Әлиә ӘБДРӘШИТОВА, 19 йәш
Бөрйән районы һылыуы. Мифтахетдин Аҡмулла исемендәге Башҡорт дәүләт педагогия университетында белем ала. Буласаҡ һөнәре – башҡорт теле уҡытыусыһы. Әйткәндәй, “Йәшлек” гүзәле – 2014” конкурсы лауреаты.

Гөлшат МАНАПОВА, 19 йәш
Салауат районынан. Башҡорт дәүләт медицина университетында белем ала. Шиғырҙар ижад итә, йырларға ярата. Тормошта атаһынан өлгө алып йәшәй.

Илнара РАХМАНҒОЛОВА, 17 йәш
10-сы класс уҡыусыһы. Өфө ҡалаһында йәшәүенә ҡарамаҫтан, конкурста тыуған яғы – Баймаҡ исеменән сығыш яһай. “Һылыуҡай – 2015” бәйгеһендә башҡорт ҡыҙҙарының матурлығын төрлө халыҡ-ара конкурстарҙа күрһәтеү маҡсатында ҡатнаша.

Диана МӨХӘМӘТЙӘНОВА, 16 йәш
Өфө һылыуы. Бәйгенең иң йәш ҡатнашыу­сыһы. 10-сы класта белем ала. Киләсәктә хоҡуҡ белгесе булырға хыяллана. Башҡорт телен камил белер өсөн һәр йыл һайын ауыл­ға – олатаһы менән өләсәһенә ҡунаҡҡа бара. Һеңлеләренә өлгө булырға тырыша.

Илмира МОТАЛОВА, 20 йәш
Хәйбулла һылыуы. Һүрәт төшөрөүгә әүәҫ. Башҡорт дәүләт педагогия университеты студенты.Татыу ғаиләлә тәрбиәләнеүе менән ғорурлана. Аш-һыу әҙерләргә ярата.

Ләйлә КӘРИМОВА, 21 йәш
Бөрйән районынан. Өфө дәүләт авиация техник университетында белем ала, буласаҡ инженер. Һүрәт төшөрөргә, сәйәхәт итергә ярата, ҡул эштәренә маһир. Төрлө телдәрҙе өйрәнә, спорт менән шөғөлләнә.

Зәлиә ЯППАРОВА, 21 йәш
Күгәрсен районының Хоҙайбирҙин ауылынан. Башҡорт дәүләт университетының философия һәм социология факультетында белем ала. Балалар өсөн хәйриә фонды булдырырға иҫәп тота. Сәләмәт тормош алып бара, дарыу үләндәре менән ҡыҙыҡһына.