04.04.2014 Ул шундай бөркөт егет ине…
Башҡортостан Республикаһының элекке эске эштәр министры, республиканың Дәүләт Йыйылышы – Ҡоролтай депутаты, Именлек Советы ағзаһы, Башҡортостандың атҡаҙанған юрисы, милиция генерал-майоры Рауил Закирйән улы Фәйрүзовҡа быйыл 65 йәш тулған булыр ине.
Яҙмыш Рауил Закирйән улына был донъяла йәшәү өсөн бик ҡыҫҡа ваҡыт бирә. Ул 1996 йылда, ни бары 47 йәшендә генә, беҙҙең аранан ҡапыл китеп барҙы. Эшенә бирелгән, ныҡлы ихтыярлы, көслө рухлы кешеләр генә ошо ҡыҫҡа ғына осорҙа бер нисә ғүмергә торошло итеп йәшәй ала. Рауил Закирйән улы Фәйрүзов та нәҡ ошондай шәхес ине.
Үҙенең 25 йылға яҡын ғүмерен милиция эшенә арнаны. Ҡатмарлы хеҙмәттең барлыҡ баҫҡысын үтеп, министр дәрәжәһенә күтәрелде, енәйәтселеккә ҡаршы көрәштә һәр ваҡыт алғы сафта булды. Ҡыйғы егете хеҙмәт һөйөүсәнлеге менән айырылып торҙо. Ниндәй генә вазифала булһа ла, Фәйрүзов үҙен, һаулығын, шәхси ваҡытын йәлләмәйенсә хеҙмәт итте һәм ярҙамсыларының үҙ бурыстарына яуаплы һәм намыҫ менән ҡарауын талап итә белде.
Юғары профессионализмы һәм хоҡуҡ тәртибен, законлылыҡты һаҡлауҙа шәхси фиҙакәрлеге менән ул иптәштәре араһында ғәйәт ҙур ихтирам һәм абруй яуланы. Кешеләрҙең психологияһын яҡшы белеүе, эш өсөн яуаплылыҡ тойоуы, кешеләрҙең ғүмерен ҡотҡарыу һәм ҡораллы, ҡурҡыныс енәйәтселәрҙе ҡоралһыҙландырыу буйынса иң ҡатмарлы һәм хәүефле операциялар менән үҙе етәкселек итте. Шуға ла һәр коллективта ул хөрмәт ҡаҙанды, киң күңелле, ярҙамсыл кеше булды.
Күптәр БР Юғары Советы рәйесе урынбаҫары, Дүртөйлө районы хакимиәте башлығы Р. Мусин үлтерелгән көсөргәнешле көндәрҙе хәтерләй торғандыр. Р. Фәйрүзовтың туранан-тура етәкселегендә был эш асылды, үлтереүселәр табылды һәм тейешле язаһын алды.
Рауил Закирйән улының күҙ асып йомғансы оператив ҡарар ҡабул итеү һәләте, иҫ киткес ойоштороу сифаты Нефтекама яғынан килеүсе автобуста ҡораллы террорсы тарафынан аманатҡа алынған пассажирҙарҙы азат иткәндә лә, енәйәтсене ҡоралһыҙландырғанда ла асыҡ күренде.
Уның тормош һәм хеҙмәт юлы – барлыҡ эске эштәр органдары хеҙмәткәрҙәре өсөн үҙ бурысыңа яуаплылыҡ менән ҡарау, эшеңә бирелгәнлек һәм намыҫлылыҡ өлгөһө. Шуға күрә лә уға «Башҡортостан Республикаһының атҡаҙанған юрисы» тигән маҡтаулы исем бирелде, күп тапҡыр Почет грамотаһы, эске эштәр органдарының батырлыҡ билдәләре һәм миҙалдар менән бүләкләнде.
Ләкин көсөргәнешле эш сәләмәтлеген ныҡ ҡаҡшатты.
Иҫ киткес кеше, республика халҡының тыныслығын һәм ғүмерен ҡыйыу яҡлаусы Рауил Закирйән улы Фәйрүзов тураһындағы яҡты хәтирәләр, иҫтәлектәр йөрәктәрҙә, күңелдәрҙә һаман да йәшәй һәм һаҡлана.
Халҡыбыҙ үҙенең данлы улдарын һис онотмай. Тыуған ауылы Үрге Ҡыйғыла генерал Фәйрүзов урамы барлыҡҡа килде, унда һәйкәл-бюст ҡуйылды. Республикала һәм Ҡыйғы районында уның иҫтәлегенә бокс һәм еңел атлетика буйынса ярыштар үткәрелә.
Ауылымдың уртаһында
Өр-яңы йорттар күрәм –
Ул сая, ҡыйғыр бөркөттөң
Исемен йөрөткән урам.
Тәҙрәләргә ҡарап барам,
Йылмая нәфис гөлдәр.
Ҡаһарман заттың рухын
Балҡытҡан икән кемдәр?
… Рәхмәт инде, яҡташтарым,
Онотмағанһығыҙ икән!
Һөйөнөп һеҙҙең барлыҡҡа,
Һоҡланып һеҙҙең тормошҡа,
Урамдар буйлап үтәм!
Радик ХӘКИМЙӘН.
Өфө ҡалаһы.