14.02.2012 Шайморатовҡа – Герой исеме
Башҡортостанда арҙаҡлы шәхесебеҙ, легендар генерал Миңлеғәле Шайморатовҡа Рәсәй Геройы исемен юллауға бәйле акция барыуы хаҡында яҙғайныҡ инде. Был сара «Комдив Шайморатов. Геройҙың ҡайтыуы» исеме аҫтында бара. Ойоштороусылары – 112-се Башҡорт кавалерия дивизияһы музейы, «Рәсәй радиоһы – Башҡортостан», Башҡортостандың хәрби хәрәкәттәрҙә ҡатнашыусылар союзы.
Был акцияны «Йәшлек» коллективы ла хуплай. Ат уйнатып, башҡорттарҙы әйҙәп, яуға барған данлыҡлы яҡташыбыҙ Герой исеменә мотлаҡ лайыҡ, тип һанайбыҙ.
Музейҙан хәбәр итеүҙәренсә, акцияға республикабыҙҙың ойошма-коллективтары дәррәү ҡушылған. Мәҫәлән, «Башҡортостан умартасылыҡ һәм апитерапия буйынса ғилми-тикшеренеү үҙәге» дәүләт учреждениеһы коллективы беренселәрҙән булып ҡултамғалар йыйып тапшырған, М. Ғафури исемендәге Башҡорт дәүләт академия драма театры ла ошо иҫәптә. Салауат ҡалаһынан, 15 меңләп ҡултамға йыйылған, тип хәбәр иткәндәр, Хәйбулла районындағы тау-байыҡтырыусыларынан, белем биреү учреждениеларынан да бер мең ҡултамға килгән.
Хөрмәтле гәзит уҡыусылар, һеҙ ҙә был изге эштән ситтә ҡалмаҫһығыҙ, тип ышанабыҙ.
Әйткәндәй, ҡултамғалар йыйыу пунктының адресы: 450095, Өфө ҡалаһы, Левитан урамы, 27-се йорт. Телефондары: 227-52-02, 227-47-57. 112-се Башҡорт кавалерия дивизияһы музейы.