12.06.2015 Һәр өлкәлә камил ҡыҙ

Һеҙҙе үҙемдең әхирәтем Айгөл Ринат ҡыҙы Мөхтәрова менән таныштырырға теләйем. Ул 1996 йылдың 10 октябрендә Әбйәлил районының Рауил ауылында тыуған.
Ғаиләләге берҙән-бер ҡыҙ, тыуған ауылында туғыҙынсы класҡа тиклем белем алғандан һуң Өфө ҡалаһының иҡтисад лицей-интернатында уҡыны. Әле Башҡорт дәүләт университетының Сибай институтында психология һәм социаль педагогика йүнәлешендә беренсе курста белем ала.
Айгөлдө тырыш, ярҙамсыл, тынғыһыҙ күңелле тип беләбеҙ. “Ныҡлы ил нигеҙендә ныҡлы ғаилә ята”, – тигән фекерҙә ул. Шуға күрә ҡатын-ҡыҙҙың төп бурысын ғаилә усағын һаҡлап, матур итеп балалар үҫтереүҙә күрә. Уның хыялы – сәйәхәт итеү һәм тормоштоң һәр минутынан, һәр мәленән сағыу төҫтәр табып йәшәү.
Уңған әхирәтебеҙ йырларға ла ярата. Ул институтта үткәрелгән “Студент яҙы – 2015” конкурсында 1-се урын яуланы. Вәхит Хызыров исемендәге йыр бәйгеһендә “Өмөт” номинацияһы еңеүсеһе. Әбйәлил районында үткәрелгән “Һылыуҡай – 2012” матурлыҡ конкурсында гран-приға лайыҡ була. Буш ваҡытын спорт менән шөғөлләнеп үткәрә.
Бөтә яҡтан өлгөр әхирәтем һәр өлкәлә камиллыҡҡа ынтыла.
Таңсулпан САФИНА.
Сибай ҡалаһы.