19.04.2013 Эштәре донъя кимәлендә таныла
Режиссер Гөлназ Ғәлимуллинаның Германия күгендәге Башҡортостан балалары менән булған авиаһәләкәткә арналған «Күл янындағы йорт» («Дом у озера») документаль фильмы Нью-Йорк фестивалендә еңеү яулаған биш проект иҫәбенә инде. Бүләкләү тантанаһы Лас-Вегаста үтте.
Фильм Боден күле өҫтөндә 2002 йылдың июлендә булған фажиғәле ваҡиғаларға нигеҙләнгән. Ул Башҡортостанда һәм Германияла ла төшөрөлгән.
Халыҡ-ара фестиваль жюрийы фекеренсә, Башҡортостан режиссеры Гөлназ Ғәлимуллинаның эше көслө, эмоциональ һәм юғары профессиональ кимәлдә башҡарылған. Бәйгелә Рәсәй телеканалдары – НТВ һәм Russia Today журналистары ҡатнашҡан.
Шуны ла билдәләп үтәйек, Нью-Йорк фестивале – радио, телевидение һәм реклама өлкәһендәге тәүге халыҡ-ара конкурстарҙың береһе. Ул 1957 йылдан үткәрелә.
Әйткәндәй, был йәш режиссерҙың абруйлы премияларға лайыҡ булған тәүге эше генә түгел. Афарин, Гөлназ!
З. ХӘСӘНОВА.
Оҡшаш яңылыҡтар
