05.04.2013 Республикабыҙҙың данын яҡлайыҡ!

25 апрелдән «Рәсәй 10» мультимедиа проект-конкурсы старт алды. Уның барышында дөйөм халыҡ һайлауы менән Рәсәйҙең 10 яңы визуаль символы һайланасаҡ. Сара 29 сентябрҙә тамамлана.
Алдан һайлап алыу турында Рәсәй төбәктәренән 700-ҙән ашыу объект – иң матур тәбиғәт ҡомартҡылары, илебеҙҙең архитектура һәм мәҙәниәт ҡомартҡылары тәҡдим ителде. Проекттың төп маҡсаты – уникаль мәҙәни һәм тәбиғәт ҡомартҡыларын күрһәтеп, Рәсәйҙең имиджын булдырыу.
Республикабыҙ конкурста Салауат Юлаев һәйкәле, солоҡсолоҡ, Ирәмәл тауы, Стәрлетамаҡ шихандары, Шүлгәнташ мәмерйәһе, «Ләлә» мәсете, Янғантау, Красноусол минераль һыу сығанаҡтары һәм «Ирәндек айыуы» алтыны менән күрһәтелгән.
Проекттың беренсе этабында (25 март – 30 июнь) федераль округтар кимәлендә 10 объект һайланасаҡ. Икенсе этапта (1 июль – 1 сентябрь) Рәсәйҙең бар төбәктәренән 30 объект финалда ҡараласаҡ. 2 сентябрҙән 29-ына тиклем илебеҙ буйынса 10 объект һайланасаҡ. Конкурс һөҙөмтәләре буйынса еңеүсе объекттарҙың бәләкәсәйтелгән күсермәләре Мәскәү өлкәһендә булдырыласаҡ ландшафтлы «Рәсәй» паркында урын аласаҡ.
Әлеге ваҡытта Волга буйы федераль округында, 26 меңдән ашыу тауыш йыйып, Стәрлетамаҡ шихандары беренсе урында килә. Икенселә – Салауат Юлаев һәйкәле (22 мең), өсөнсөлә Татарстандағы Раиф Богородица монастыры (17 меңдән ашыу) урынлашты.
Проектта ҡатнашыу өсөн «Рәсәй 10» сайтына – http://10russia.ru/sights/7/all инергә, «Башҡортостан Республикаһы» ҡушымтаһын һайларға кәрәк. 24 сәғәт эсендә бер IP-адрес аша өс тапҡыр тауыш бирергә була.