26.02.2013 Ғорурлыҡ һәм һоҡланыу тойғоһо уята

«Яҡташтар» проектына ауылдашым, һуғыш һәм хеҙмәт ветераны Нуретдин Да­уытовты тәҡдим итер инем. Әбйәлил районының Тәпән ауылында уның менән бер урамда күрше булып йәшәгәнлектән, хеҙмәт юлын, тормошон күреп, һоҡланып үҫтем.
Һуғыш башланғас, Нурет­дин бабай хәрби комиссариатта йәшен арттырып әйтеп, үҙ теләге менән яуға китә. Һуғыш юлын Белоруссияла снайпер булып үтә. ҡаты яраланып, госпиталдә ята. Тә-нендәге снаряд ярсығы ғүмеренең ахырынаса һуғыш осорон иҫләтеп тора. ҡыйыу, көслө ауылдашымдың ҡаһарманлығын ҡыҙыл Байраҡ ор­дены һәм башҡа күп орден-миҙал иҫбатлай. Ты­ныс тормошта Нуретдин Ла­тиф улы ғүмере буйы Калинин исемендәге колхозда тракторҙа эшләне. Уның үҙе кеүек боҙолоу белмәҫ «ҡорос аты» мәңге эш өҫтөндә ине. Колхоздың алмаштырғыһыҙ тракторсыһы эштән нисек арып ҡайтһа ла, кеше йомошон кире ҡаҡманы.
Яу яланында ла, тыныс тормошта ла дан ҡаҙанған, эшһөйәрлегенә һәйкәл ҡу­йыр­лыҡ. Хаҡлы ялға сыҡҡас та өйҙә тыныс ултырып толҡа тапманы. Һәр хәлдә, хаҡлы ялдағы бабайҙар рәтендә өй алдындағы эскәмйәлә ултырғанын күрмәнем. Һалмаҡ баҫып, ҡулына көрәк йә тәпке тотоп, картуф баҡсаһына барыр, йә яурынына һалып балан, ҡомалаҡ йыйып алып ҡайтыр ине. Уның мәңге ниндәйҙер эш менән булышыуы әле лә күҙ алдымда. Үҙ донъя­лары менән йәшәгән балаларына йорт та һалышты, бөтә хужалыҡ эштәренә лә етеште.
Һағынып һөйләрлек йылы хәтирәләр һаҡлаған, бәхетле бала сағым үткән урамыбыҙға тик ғорурлыҡ һәм һоҡланыу тойғоһо уятҡан Нуретдин Дауытовтың исемен биреү бик дөрөҫ булыр ине.

Зөлфиә ЗАҺИТОВА.

Әбйәлил районы,
Асҡар ауылы.