26.02.2013 Насар һүҙле фельдшер хаҡында
Дауаханала иртәнән алып кискә тиклем ауырыуҙарҙы табип менән фельдшер ир хеҙмәтләндергән. Фельдшерҙың теле шул тиклем әшәке булған, ул кемде лә булһа насар һүҙҙәр менән әрләмәйенсә тормаған. Ул хатта үҙенең бысраҡ һүҙҙәре менән Аллаһы Тәғәләгә лә ҡағылған.
Бер заман табипҡа бик алыҫтан дуҫы килеп төшә. Табип уны үҙе яһаған операцияны күҙәтергә саҡыра һәм унда фельдшер ҙа ҡатнаша. ҡунаҡты операция өҫтәлендә ятҡан кешенең яраһынан ағып сыҡҡан насар еҫле ҡан ҡатыш эренде күреү тетрәндерә. Ә теге фельдшер һаман да шул үҙ холҡон ташламай: тағы ла йәмһеҙерәк, насарыраҡ һүҙҙәрҙе ҡабатлай. Шул саҡ табиптың дуҫы был тиклем дә бәйһеҙлеккә түҙмәйенсә:
– Һин нисек был кешенең ошондай насар һүҙҙәрен түҙеп тыңлап тораһың? – ти.
– ҡәҙерле дуҫҡайым, – ти табип, – мин эренле яраларға өйрәнеп бөттөм инде. Уларҙан эрен ағырға тейеш. Әгәр ҙә эрен кешенең тәненә йыйыла икән, ул асыҡ яранан сыға. Ә инде эрен уның күңелендә икән, ауыҙынан ағасаҡ. Минең фельдшерым да ошо насар һүҙҙәре менән күңелендә йыйылған асыуын түгә һәм күңеленән уларҙы яранан сыҡҡан эрен һымаҡ итеп сығара.
Рәмилә ТАЙСЫНОВА
тәржемәһе.
Оҡшаш яңылыҡтар
