01.02.2013 һөйөү һүҙҙәрен йәлләмә!

Иң оригиналь һөйөү смс-хәбәрен яҙыусыға – бүләк!
Йәндәр был донъяла бер-береһен эҙләп табып, ғаилә ҡороп, нәҫелдәрен дауам итә. Шуларҙың йөҙҙән, меңдән бер парына ғына Аллаһы Тәғәлә ҙур һынау һәм шул уҡ ваҡытта оло бүләген һәҙиә итә икән – ул ысын, саф мөхәббәт. Хәҙер инде ер йөҙөндә бындай көслө тойғоно татыған, аҡылынан шашып яратҡан кешеләрҙең, мөхәббәт тарихы китаптарға яҙылған Таһир һәм Зөһрә, Ләйлә һәм Мәжнүн, Йософ һәм Зөләйха, Тристан һәм Изольда, Ромео һәм Джульетта һөйөүенең көсөн кемдәр­ҙең генә татығыһы килмәй икән дә, кемдәр генә аҡҡоштарҙың тоғролоғона көнләшмәй һуң?
Эйе, мөхәббәт утында яныу үҙе бер бәхет! Көн дә ҡоштар моңона күмелгәндәй, наҙлы һүҙҙәргә күмелеп йәшәргә кәрәк! Тик ниндәйен һайларға уларҙың – оло хисте һаҡлау, ҡулға-ҡул тотоношоп мөхәббәт яланында йөрөү өсөн ҡайһы һүҙҙәр лайыҡлы булыр? Дуҫтар, етеп килгән Ғашиҡтар көнө айҡанлы, һеҙҙән иң шәп һөйөү смс-хәбәренә бәйге иғлан итәбеҙ. Сәләмдәрегеҙҙе дежур телефонға 8 965 92 32 000 номеры буйынса йәки “Вконтакте” сайтында “Йәшлек” гәзите битенә яҙып ебәрегеҙ
Ә “Йәшлек” саф мөхәббәтте бына тигән бүләктәр менән баһаламаҡсы! Иң-иң матур, үҙенсәлекле, ҡыҙыҡлы һөйөү сәләмен ебәреүселәр һайлап алынасаҡ һәм еңеүсе тип билдәләнәсәк.
Хоҙай Тәғәлә барығыҙға ла мөхәббәт бүләк итһен. Ул бер һәм мәңгелек булһын. Ә уныһы инде һәр кемдең үҙенән тора.