08.01.2013 Шайморатов исемен махсус отряд йөрөтәсәк
Яңы йыл алдынан данлыҡлы батырыбыҙ Миңлеғәле Шайморатовтың исемен мәңгеләштереү өсөн йәнә бер аҙым яһалды.
Өфөнөң Конгресс-холл бинаһында Рәсәй Эске эштәр министрлығының Волга буйы төбәгендәге эске ғәскәрҙәренең “Булат” 29-сы махсус тәғәйенләнештәге (спецназ) отрядына генерал-майор Миңлеғәле Шайморатовтың исеме бирелеүгә арналған тантана үтте.
Рәсәй Президенты Владимир Путиндың указы менән лайыҡлы исем отрядҡа айырыуса батырлыҡ күрһәткәне өсөн бирелде. Әле “Булат”та ҡаһарманлыҡ орденының (орден Мужества) 29 кавалеры, 10 “ҡыйыулыҡ өсөн” миҙалы, алты “Ватан алдындағы ҡаҙаныштары өсөн” миҙалын йөрөтөүсе хеҙмәт итә. Тағы ла 30 офицер һәм һалдат Жуков, Суворов миҙалдарына лайыҡ булған.
Ысындан да илһөйәрҙәр һәм батырҙарҙан торған отрядҡа Бөйөк Ватан һуғышы ҡаһарманы, легендар Башҡорт кавалерия дивизияһы командирының исеме бирелеү бер ҙә юҡтан түгел. Артабан да “Булат” һынатмаҫ, яугир рухына тап төшөрмәҫ, тигән ышаныс ҙур.
Оҡшаш яңылыҡтар
