09.10.2010 Беҙҙе рух берләштерә

Халыҡ байрамын билдәләр алдынан гәзит уҡыусыларға «Суверенитет беҙгә нимә бирҙе? Өмөттәр аҡландымы?» тигән һорау менән мөрәжәғәт иттек. Шуныһы һоҡландырҙы: яуап биреүселәрҙең барыһын да тыуған төйәгебеҙгә һөйөү, уның ҡаҙаныштары менән ғорурланыу һәм киләсәккә өмөт менән ҡарау берләштерә.

Миләүшә ХӘБИЛЕВА, Сибай яҙыусылар ойошмаһының әҙәби консультанты:
– Башҡортостан, үҙ аллы үҫеш юлын һайлап, халыҡтың йәшәү сифатын яҡшыртыуға, ауыл-ҡалаларыбыҙҙы күркәмләндереүгә ирешә алды. Рухи күтәрелеш дәүере тип атар инем мин был осорҙо. Бер аҫаба халыҡтың ғына түгел, республикабыҙҙа йәшәүсе барлыҡ милләттәрҙең рухи-мәҙәни ихтыяжын ҡәнәғәтләндереүгә күп көс һалынды. Үҙебеҙҙең Сибайҙы күҙ уңында тотоп әйтһәм, был йылдарҙа ҡалабыҙ күҙгә күренеп төҙөкләнде. Филармония, «Сулпан» балалар театры, сәнғәт колледжы асылыуының үҙаллылыҡ емештәре икәнен танымай мөмкин түгел.
Халыҡтың тарихи үткәне менән ҡыҙыҡһыныуы кө­сәйҙе. ҡалабыҙҙа Алдар Батыр, Зәки Вәлиди, Төньяҡ амурҙары тигән исемдәр бирелде. ҡала эргәһендә Арҡайым, Сармат тип исемләнгән матур ҡасабалар ҡалҡып сыҡты. Был ыңғай күренештәрҙе нисек үҙаллылыҡ емештәре тип атамаҫһың?!
Ирешкән уңыштарҙы тәләфләмәй, артабан да дауам итеү – беҙҙең бурысыбыҙ.

Вәсилә ҒӘБИТОВА, 3-сө башҡорт республика гимназия-интернаты уҡытыусыһы, Күмертау ҡалаһы:
– Йыл һайын Республика көнөн көтөп алабыҙ. Быйыл да ҡалабыҙҙа байрам уңайынан Кинйә Арыҫланов исемендәге халыҡ ансамбле коллективы менән концерт күрһәттек.
Башҡортостан дәүләте егерме йыл буйы халҡының яҡты киләсәгенә лайыҡлы юл ярҙы. Тимәк, өмөттәр аҡланған, тимәксемен. Үҙем ҡала мәктәбендә уҡыған йыл­дарҙы бөгөнгө менән сағыштырһам, эстән һөйөнөп ҡуям. Уҡыусыларымдың кинәнеп туған телен, тарихты, ғөрөф-ғәҙәттәребеҙҙе, йолаларыбыҙҙы өйрәнеү мөмкинлеге бар. Балаларға белем биреп, телебеҙҙе һаҡлауға өлөш индерә алыуымды егерме йыл элек яуланған үҙаллылыҡтың иң оло ҡаҙанышы тип ҡабул итәм. Киләсәктә лә телгә, тарихҡа ихтирамлы мөнәсәбәт юғалмаһын тигән теләктә ҡалам.

Шәһит СӘЙФУЛЛИН, БДУ сту­денты, 20 йәш:
– Мин суверенитеттың «ҡорҙашы» булам. Аҡылым менән уның Башҡортостан халыҡтары өсөн ниндәй ҙур әһәмиәткә эйә булыуын аңлайым. Мөһим боролоштоң милли үҙаңды үҫтереүҙә, патриотизм тәрбиәләүҙә роле көслө, тимен. Ә шулай ҙа беҙ тағы ла юғарыраҡ үрҙәргә ирешә ала инек. Был йәһәттән республиканы Рәсәй, донъя кимәлендә танытыр тарихи кинофильмдар төшөрөүҙе, йыр-бейеүҙәр сығарыу­ҙы иҫәптә тотам.
Шулай ҙа өмөттө лә өҙөргә ярамай, тормош дауам итә бит. Бәлки, киләсәктә республикабыҙҙы баш­ҡорт балы менән генә түгел, ә та­рихи, легендар батырҙары менән танытырҙай сәхнә әҫәрҙәре, әҙәби китаптар ижад ителер, фильмдар төшөрөлөр?

Илфат КӘЛИМУЛЛИН, Мәсетле районы, Һабанаҡ ауылы:
– Үҙаллылыҡты башҡортса белем алып, гәзит-журнал уҡып, тапшы­рыуҙар ҡарау ғына тип аңларға ярамай. Иң мөһиме – был йылдарҙа республикабыҙҙың Рәсәй кимәлендә абруйы күтәрелде, сит илдәр менән бәйләнештәр булдырылды, төпкөл ауылдарҙа ла мәктәптәр, мәҙәниәт усаҡтары ҡалҡып сыҡты, юлдар һалынды, халыҡтың социаль көнкүреше төп хәстәргә әүерелде. Республика етәкселеге, бар мөмкинлектәрҙе файҙаланып, ауылда йәшәүсе күп балалы ғаиләләргә пособиелар түләүгә, льготалар булдырыуға өлгәшә алды. Биш бала табыусы әсәләргә тапшырылған «Әсәлек даны» миҙалы, туғыҙ балалыларға бирелгән микроавтобус­тарҙы нисек республика ҡаҙанышы тип баһаламайһың?!