31.08.2012 Сыңғыҙ мәктәбенең баҡсаһы— иң яҡшыһы!
Мәктәптәр оҙайлы йәйге каникулға туҡтаған мәлдә лә, унда шаулап-гөрләп эштәр дауам итә. Яңы уҡыу йылына әҙерлек мәлендә буяуҙарҙан бигерәк, төрлө гөл-сәскәләрҙең еҫе күңелде арбай. Быйыл райондағы ҡоролоҡ йәшеллек донъяһына ҙур зыян килтерһә лә, күп кенә мәктәптәр уҡытыусылар һәм уҡыусыларҙың ҙур тырышлығы менән аллы-гөллө сәскәләргә күмелде.
Сыңғыҙ мәктәбенең баҡсаһына барып инеү менән төрлө әйберҙәрҙән (буш пластик һауыттар, тәгәрмәс, иҫке биҙрә-кәстрүлдәр һ.б.) эшләнгән әкиәт персонаждары, ҡоштар, хайуандар сағыулығы менән иғтибарҙы йәлеп итә. Мәктәп директоры Рәйлә Баҙарбай ҡыҙы Солтангилдина әйтеүенсә, улар уҡыусылар менән ҡышҡыһын уҡ баҡсаны нисек биҙәү тураһында уйлай башлай. Балалар хеҙмәт, рәсем дәрестәрендә бар фантазияһын эшкә ҡушып, бер-береһе менән ярыша-ярыша үҙ тәҡдимдәрен индерә. 
Шуға күрә Сыңғыҙ мәктәбенең баҡсаһы сәскәләр төрлөлөгө, йәшелсә муллығы һәм ҡабатланғыһыҙ матурлығы менән айырыла. Быйыл ул − Баймаҡ районының иң яҡшы баҡса үҫтереүселәренең береһе. Биология уҡытыусыһы М. Алтынбаева әйтеүенсә, уҡыусылар менән берлектә мәктәп ашханаһына етерлек картуф, сөгөлдөр, кәбеҫтә, кишер һәм башҡа йәшелсә үҫтерелә. Уңған сыңғыҙҙар артып ҡалғанын һатып аҡса итеүгә лә өлгәшә. Әлбиттә, быйылғы ҡоролоҡ, ауылдағы Күсәбә йылғаһының һыуһыҙ ҡалыуы мәктәп баҡсаһына һиҙелерлек зыян килтерә. Шулай ҙа уҡытыусылар һәм уҡыусылар төшөнкөлөккә бирелмәй, аяуһыҙ ҡояш нурҙары аҫтында тырышып эшләп, матур, һоҡланғыс баҡса үҫтерә.
Эйе, тик уңғандарға һәм эшһөйәрҙәргә генә бәхет йылмая шул.
Гүзәл ИҪӘНГИЛДИНА.
Баймаҡ районы.
Оҡшаш яңылыҡтар
