13.08.2011 Был аҙнала беҙҙе...
Аптыратты...
«Болғар» теплоходының ниндәй сәбәптәр арҡаһында батыуын әле һаман асыҡламанылар.
Эксперттар, белгестәр аныҡ ҡына һығымтаға килә алмай ҡаңғыра. ҡайһы бер тикшереүселәр фекеренсә, «Болғар»ҙың төбө тутығып тишелгән һәм шул арҡала уға алдан уҡ һыу инә башлаған. Һыу иллюминаторҙар аша ғына ингән осраҡта быны кешеләр күрер һәм ҡотолоп өлгөрөр ине, тигән фекерҙе яҡлаусылар күп. Капитан үҙенең үлеменә тиклем судноның бәләгә осрауын аңламаған һәм бер нәмә лә эшләргә өлгөрмәгән, тип һанайҙар.
Өмөтләндерҙе...
ҡаҙағстандың Аҡтау ҡалаһында кеҫә телефондарының сигналын автоматик рәүештә баҫыусы сиркәү барлыҡҡа килде.
Сиркәү хужаларын бындай ҡорамал ҡуйырға ҡайһы бер кешеләрҙең мөһим урынға килеп, ҡысҡырып телефондан һөйләшеүе, башҡаларға ҡамасаулауы мәжбүр иткән.
Йәмәғәт урындарында, төрлө сараларҙа, мәсеттәрҙә кеҫә телефонын ҡулланыусылар аптырата. Кеҫә телефондарының сигналын баҫыусы ҡорамалдарҙы башҡа урындарҙа ла ҡуйырға ниәтләйҙәр. Беҙҙең ил дә ҡаҙағстандан өлгө алыр һәм мөһим урындарҙа сигналдарҙы баҫыусы ҡорамалдар ҡуйыр, тип ышанғы килә.
һағайтты...
Рәсәй Президенты Дмитрий Медведев менән Украина Президенты Виктор Януковичтың Сочиҙағы эшлекле осрашыуы серле шарттарҙа үтте.
Журналистарҙы һөйләшеүгә индермәүҙәре бер хәл, исмаһам, һөҙөмтәләр хаҡында ла бер ниндәй ҙә аңлатма юҡ.
Хәҙер үҙәк киң матбуғат саралары, Рәсәй менән Украина араһында «баллы ай» бөттө, тип яҙа. Һәр кем былай ҙа аңлап тора – ике ил араһында һуңғы ваҡытта билдәләнгән проблемалар буйынса бер ниндәй хәл иткес һығымталар ҙа яһалмаған. Шуға ла ике Президент та йәмәғәтселеккә бер ниндәй ҙә аңлатма бирмәй.
Хәүефләндерҙе...
Норвегияның террорсы-маньягы Андерс Брейвиктың енәйәтен тикшереүгә компьютер эксперттары ла ҡушылды.
Улар террорсының манифесында бөтә Көнбайышты уратып алған объекттарҙың координаттарын тапҡан. Хәҙер эксперттар шуны аңлай алмай: маньяк үҙенә иғтибар йәлеп итергә генә теләгәнме, әллә инде был объекттар уның енәйәттәштәре өсөн әҙерләнгәнме?
Шулай ҙа Брейвиктан 40 сәғәт буйы һорау алғандан һуң белгестәр, ул терактты бер үҙе генә әҙерләгән, тигән фекергә килгән. Ләкин Көнбайыш илдәре был ҡот осҡос хәлдән һуң өҫтәмә хәүефһеҙлек сараларын күрә башлаған.
Оҡшаш яңылыҡтар
